Քննարկվել է կարգավորման ողջ սպեկտրը, բոլոր պայմանավորվածությունները, որոնց մի մասը կատարվել է, մի մասը՝ ոչ. սա ՀՀ ԱԺ փոխնախագահ Ռուբեն Ռուբինյանի պատասխանն է` թուրք գործընկերոջ հետ իր վերջին հանդիպման մասին։
Հիշեցնենք, Անթալիայի դիվանագիտական ֆորումի շրջանակներում, օրերս կայացել էր Հայաստանի հետ բանակցություններում Թուրքիայի հատուկ ներկայացուցիչ Սերդար Քըլըչի և Ռուբեն Ռուբինյանի հանդիպումը։
Այսօր խորհրդարանում լրագրողների հետ զրույցում Ռուբեն Ռուբինյանին ասաց, որ վերջերս Ստամբուլում Անիի կամրջի վերականգնման հետ կապված տեխնիկական մասնագետների հանդիպում է տեղի ունեցել։
Մարգարայի անցակետի հարցի վերաբերյալ էլ Ռուբեն Ռուբինյանը նշեց, որ հայկական կողմը կատարել է պայմանավորվածությունը, հայկական կողմից անցակետը պատրաստ է. «Սպասում ենք թուրքական կողմին, այս հարցի հետ կապված ոչ մի նորություն չկա»։
Կարդացեք նաև
Դիտարկմանը, որ Ադրբեջանը ձգձգում է խաղաղության համաձայնագրի ստորագրումը՝ զուգահեռ նաև կրակելով սահմանին, Ռուբինյանն արձագանքեց․ «Ինձ թվում է՝ կարիք չկա, ես ասեմ՝ ինչով եմ պայմանավորում դա, բոլորն էլ գիտեն, որ Ադրբեջանն աշխարհի ամենակառուցողական երկիրը չէ»:
Նելլի ԳՐԻԳՈՐՅԱՆ
