Այսօր Երևանի ընդհանուր իրավասության քաղաքացիական դատարանում «Մայր Հայաստան» խմբակցության անդամ Գրիգոր Իսկանդարյանն ընդդեմ Երեւանի քաղաքապետ Տիգրան Ավինյանի հոր՝ Արմեն Ավինյանի գործով նախնական նիստն է տեղի ունեցել:
Հիշեցնենք, որ ավագանու անդամը դատարան հայց էր ներկայացրել Երեւանի քաղաքապետ Տիգրան Ավինյանի հոր դեմ, վերջինիս վիրավորական արտահայտությունների համար:
Հիշեցնենք նաեւ, որ 2024 թվականի դեկտեմբերի 26-ին Ավինյանի հայրը լրագրողի հետ զրույցում opel մակնիշի վարորդներին անվանել էր «համբալ»:
Կարդացեք նաև
«Ես դատական հայց էի ներկայացրել Ավինյանի հոր դեմ, քանի որ ինքս էլ ունեմ opel մակնիշի մեքենա»,- այսօր ուղիղ եթերով նիստից հետո հայտնեց ավագանու անդամը:
Նախնական նիստում դատարանն այսօր քննարկեց հայցվոր կողմի ներկայացրած ապացույցները: Ըստ Իսկանդարյանի՝ իրենք ներկայացրել են այն տեսահոլովակը, որտեղ էլ քաղաքապետի հայրը վիրավորական իր գնահատականներն է հնչեցնում opel-ի վարորդների հասցեին.
«Տիգրան Ավինյանի հոր կողմից ոչ ոք ներկա չէր՝ ո՛չ ինքը, ոչ՝ փաստաբան: Նիստն անցավ նորմալ, ընթացքում քննարկվեցին այն ապացույցները, որոնք մենք ներկայացրել ենք: Այն տեսահոլովակը, որտեղ այդպիսի արտահայտություններ է անում, մասնավորապես` opel-ի վարորդներին անվանելով «համբալ»:
Դատական հաջորդ նիստը նշանակվել է մայիսի 25-ին, ժամը 15:00-ին:
Իսկանդարյանն Արմեն Ավինյանից պահանջում է ֆինանսական փոխհատուցում վիրավորանքի համար ՝ 500 հազար դրամի չափով։
Արփինե ՍԻՄՈՆՅԱՆ
