«Մենք բաց ենք եւ լրատվությունը տրամադրվում է հնարավորինս արագ եւ օբյեկտիվ: Այսինքն, երբ կա խնդիր, մենք ներկայացնում ենք: Այս պահին իրադրությունը հարաբերականորեն կայուն է: Ձեր վկայակոչած կրակոցները, որոնք երբեմն տեղի են ունենում, ոչ նշանառու, անհասցե սակավաթիվ կրակոցներ են… »,-լրագրողների հետ զրույցում ասաց Պաշտպանության նախարարի տեղակալ Արման Սարգսյանը՝ պատասխանելով լրագրողի այն հարցին, թե Պաշտպանության նախարարությունն ինչ է ձեռնարկում սահմանային կրակոցների հետ կապված, հատկապես որ վերջերս Սյունիքում տներ էին վնասվել:
«Այս պահին կուտակումներ չկան: Եթե նման խնդիր ծագի, Հայաստանի Պաշտպանության նախարարությունը կազմակերպական գործողություններ կիրականացնի: Եթե պաշտոնական տեղեկատվությունը ձեզ համար արժանահավատ չէ, դուք հավատալու եք տարածվող տեսանյութերին, ուրեմն ինձանից չպետք է հարցնեք: Զինված ուժերն իրենց լիազորությունների եւ պարտականությունների շրջանակներում կատարում են իրենց աշխատանքը, եւ առաջնահերթ խնդիրը անվտանգության ապահովումն է այս պահին: Առաջնագծում հարաբերականորեն կայուն իրավիճակ է, եւ որեւէ խնդիր ծագելու պարագայում անմիջապես տեղեկատվություն կտրամադրենք»,-ասաց ՊՆ փոխնախարարը:
Արման Սարգսյանը չցանկացավ պատասխանել հայ-իրանական զորավարժությունների մասին հարցին, ասաց, որ դրա վերաբերյալ տարածվել է համապատասխան հաղորդագրություն:
Կարդացեք նաև
Գոհար ՀԱԿՈԲՅԱՆ
