Երեւան քաղաքի քրեական դատարանի «Աջափնյակ 1» նստավայրում դատավոր Արամայիս Ասատրյանի նախագահությամբ այսօր կայացավ «Հունիսի 12-ի գործի» հիմնական դատալսումների երրորդ նիստը, որում դատավարության մասնակիցները ուսումնասիրեցին մեղադրող կողմի ներկայացրած՝ բոլոր մեղադրյալների վերաբերյալ տեսագրությունների արձանագրությունները:
Պաշտպանական կողմի գնահատմամբ՝ ցուցադրված բոլոր տեսանյութերում իրականությունը նկարագրված է առնվազն ոչ ամբողջական, պարզ երեւում է, որ 2024 թվականի հունիսի 12-ին Բաղրամյան-Դեմիրճյան փողոցների հատման վայրում ոստիկանության եւ ցուցարարների միջեւ տեղի ունեցած բախման ընթացքում ոստիկանների ոչ մի ագրեսիվ գործողություն, ոչ մի բռնություն արձանագրված չէ եւ այս քրեական վարույթի շրջանակներում որեւէ հետեւանք չի առաջացրել:
«Մենք այդպիսի բազմաթիվ դրվագներ ենք տեսնում: Ինչ վերաբերում է մեղադրյալներին, կոնկրետ Լեւոն Սաֆարյանն ինքը հայտարարություն արեց այն մասին, որ հարված է ստացել եւ ցավից ոստիկաններին ուղղված ինչ-որ գործողություն է կատարել: Այսինքն, դրդումը եղել է էմոցիոնալ եւ որեւէ կերպ խուլիգանական չէ: Նույնը, առնվազն իմ պատկերացմամբ, վերաբերում է բոլորին, որոնց գործողություններին եւս տեղյակ եմ»,-լրագրողներին ասաց փաստաբան Ռուբեն Մելիքյանը:
Կարդացեք նաև
«Շատ կարեւոր է՝ նաեւ հանրությունը տեղեկանա, որ այս տեսագրությունները եղել են հրապարակային: Մարդիկ տեսել են, թե ով է ագրեսիա դրսեւորել՝ ոստիկաննե՞րը, թե՞ քաղաքացիները: Առավելապես ակնհայտ է, որ ագրեսիա դրսեւորողները ոստիկանության ծառայողներն են: Այսինքն, մեր պատկերացմամբ, նախաձեռնողները ոստիկաններն են: Եվ տարօրինակ չէ, որ երկու քրեական վարույթ կա: Սա մեկն է: Մյուսը քնած վիճակում է, որեւէ մեղադրյալ չկա: Այսպիսի տակտիկա են ընտրել. թող քննեն, թող պարզեն: Ոչ մի բան էլ չեն քննում, ոչ մի բան էլ չեն պարզում»,-ավելացրեց իրավապաշտպանը:
Դատական նիստի ավարտին հինգ մեղադրյալների պաշտպանությունն ստանձնած փաստաբան Վարդուհի Սարգսյանը խափանման միջոցի հետ կապված միջնորդություն ներկայացրեց, որ մեղադրյալների նկատմամբ որպես խափանման միջոց ընտրված է նաեւ էլեկտրոնային հսկողությունը համապատասխան սարքերի առկայությամբ: Սակայն իրենց պաշտպանյալների պարագայում չկան այնպիսի սահմանափակումներ, որոնք էլեկտրոնային հսկողության անհրաժեշտություն առաջացնեն: Եվ միջնորդեց դատարանին, որպեսզի այդ էլեկտրոնային հսկողությունը վերացվի:
Դատարանը միջնորդությունը հիմնավոր համարեց եւ վարույթով ներգրավված բոլոր մեղադրյալների նկատմամբ էլեկտրոնային հսկողությունը վերացրեց:
Դատավարության ընթացքում նիստերի դահլիճում էր «Սրբազան պայքարի» առաջնորդ Բագրատ Սրբազանը:
Աշոտ ՀԱԿՈԲՅԱՆ
