Քասախ համայնքի բնակիչները նախազգուշական բողոքի գործողություններ են իրականացնում: Նրանք փակել էին Աշտարակի խճուղին՝ բողոքելով տրանսպորտային վերջին փոփոխության դեմ. տրանսպորտի 25 և 59 համարների գծերը կրճատվել էին եւ նոր՝ ավելի թանկ երթուղի է մտցվել, որը սպասարկելու է «Մուլտիտրանսպորտ» ընկերությունը 250 եւ 200 դրամ արժեքով։ Պռոշյան համայնքի երթուղիների խնդիրը կառավարությունում հանդիպումից հետո մասնակի լուծվել է՝ 25 համարի հետ կապված, քասախցիներինը՝ ոչ:
«Մենք ընտրել ենք կառավարությանը, քայլել ենք այս կառավարության հետ… Ես աչքս բացել եմ, մեր համայնքում գործել է ավտոբուս, հետո դա փոխարինվեց գազելներով, ընդունեցինք, հասկացանք բոլոր դժվարությունները: Մենք 2018 թվից ունենք ավտոբուս, որ գնում-գալիս էր, տվյալ ավտոբուսը հարմարեցված է հաշմանդամություն ունեցողների, սայլակավոր մայրերի համար: Դե թող հիմա թող գան, բացատրեն, էդ գազելով ո՞վ կարող է ինձ իջեցնել քաղաք… Դիմում եմ ԱԺ նախագահին, Երեւանի քաղաքապետին, թող որոշումը վերանայեն, նախկինի մնացորդներն իրավունք չունեն նորից գործելու»,-ասում էր հաշմանդամություն ունեցող մի քասախցի՝ կատարվածի մեջ մեղադրելով նախկին իշխանություններին, չնայած որոշումը կայացրել է գործող իշխանության օրոք:
Կարդացեք նաև
«Փողոց փակելն ընդամենը նախազգուշական քայլ է: Մենք մինչեւ չստանանք մեր հարցի լիարժեք պատասխանը, կանգ չենք առնելու: Մենք սպասում ենք պատկան մարմինների արձագանքին: Գուցե արդեն հացադուլ հայտարարենք, ունենք հաջորդական քայլեր, մեր քայլերը շատ հստակ են, պատասխանի ամեն ուշացման դեպքում, հաջորդաբար քայլերն ավելի կոշտ են լինելու: Մեր հավաքը շատ օրինական է եւ շատ կազմակերպված»,-ասաց մեկ ուրիշ քասախցի:
Քասախցիները պահանջում են, որ մարզպետը գա Քասախ եւ հանդիպի իրենց հետ:
Նրանք ասում են, որ ընտրել են իշխանություն, որը պետք է ծառայի ժողովրդին, եւ իրենց հարցի լուծում չստանալն է ստիպել դիմել ծայրահեղ քայլերի:
Գոհար ՀԱԿՈԲՅԱՆ
