Արցախցիների իրավունքների պաշտպանության խորհրդի անդամներն Ազատության հրապարակում հանդիպում են անցկացնում «Համահայկական ճակատի» եւ «Համահայկական միասնության ազգային խորհրդի» անդամների հետ։
«Այս իշխանությունը՝ Նիկոլի գլխավորությամբ, փորձում է այնպիսի պայմաններ ստեղծել, որ արցախցիները լքեն Հայաստանը»,- ասաց «Համահայկական միասնության ազգային խորհրդի» անդամ Ալբերտ Բազեյանը։
Կարդացեք նաև
Նա նշեց՝ Նիկոլ Փաշինյանը չի հասկանում, որ ներկայիս Հայաստանն արեւելյան Հայաստանի մի մասն է։ Իսկ Արեւմտյան Հայաստանն ավելի մեծ տարածքով է, որը ցեղասպանության հետեւանքով է հայաթափվել։ Ալբերտ Բազեյանն ասաց, որ նախաձեռնությամբ է հանդես գալու՝ քանի որ Նիկոլ Փաշինյանը ուրանում է Հայոց ցեղասպանությունը, պետք է ապրիլի 24-ին փակել նրա ճանապարհը, որպեսզի չկարողանա բարձրանալ Ծիծեռնակաբերդի հուշահամալիր։
«Պետք է օր առաջ համախմբել մեր ժողովրդին, մենք դրանով զբաղվում ենք։ Մենք պարտադրելու ենք Նիկոլ Փաշինյանի հեռացումն ու գործող ԱԺ լուծարումը։ Դրանից հետո պետք է ձեւավորել ազգային իշխանություն»,- ասաց Բազեյանը։
Նա ասաց, որ չենք կարող համակերպվել Արցախի կորստի հետ։ Արցախն այսօր ժամանակավոր է օկուպացված Ադրբեջանի կողմից, հայերն այն հետ են բերելու։
Ռոզա ՀՈՎՀԱՆՆԻՍՅԱՆ
