2024-2025թթ. ուսումնական տարվա դպրոցականների օլիմպիադայի քաղաքային փուլի 1-ին կարգի դիպլոմակիրներն արժանացել են Երևանի քաղաքապետի պարգևների: Երևանցի 57 աշակերտի հանձնվել են դիպլոմներ ու գրախանութի նվեր-քարտեր:
«Կրթվելը միայն մրցույթում հաղթելը չէ. դա ձեր անձնական կայացման, ինքնուրույն ընտրություն անելու և արժանապատիվ կյանք կառուցելու հիմքն է։ Յուրաքանչյուր աշակերտ գրանցած իր հաջողությամբ ոչ միայն իր ապագան է կերտում, այլև` մեր երկրի ու քաղաքի»,- շնորհավորելով դիպլոմակիրներին՝ նշել է քաղաքապետն ու մաղթել, որ սովորելու նրանց ձգտումը երբեք չնվազի։
Հանդիպման շրջանակում Երևանի քաղաքապետը համայնքային դպրոցների տնօրենների ու վարչատնտեսական համակարգողների հետ քննարկել է նաև ոլորտում առկա խնդիրներն ու լսել նրանց առաջարկները:
«Դպրոցը պետք է լինի անվտանգ և բաց տարածք՝ հիմնված գիտելիքի, արժեքների և քաղաքացիական մտածողության վրա։ Մեր նպատակը միայն գիտելիք փոխանցելը չէ, մեր նպատակը կրթության միջոցով պատասխանատու, իրավագիտակից, մտածող քաղաքացի ձևավորելն է։ Մեր երեխաներն այսօր պետք է ունենան ավելին՝ վերլուծելու և մտածելու կարողություն, կողմնորոշվելու ու որոշում կայացնելու վստահություն, թիմում աշխատելու և պատասխանատվություն կրելու հմտություն։ Սա հնարավոր չէ իրականացնել առանց ձեր ներգրավվածության։ Ձեր դերը առանցքային է ոչ միայն կազմակերպչական, այլև գաղափարական առումով»,- նշել է քաղաքապետը:
Կարդացեք նաև
Տիգրան Ավինյանը պատասխանել է նաև քաղաքի զարգացման վերաբերյալ հարցերին, ներկայացրել ընթացիկ ու նախատեսվող ծրագրերը:
ԵՐԵՎԱՆԻ ՔԱՂԱՔԱՊԵՏԱՐԱՆ
