«Իհարկե, դա ձեռագիր չէր։ Ես կարծում եմ՝ նույնիսկ արխիվներում կարելի է գտնել, դա չէր կարող ձեռագիր լինել»,- խորհրդարանում լրագրողների հետ զրույցում ասաց Հեռուստատեսության և ռադիոյի հանձնաժողովի նախագահ Տիգրան Հակոբյանը՝ պատասխանելով ժամանակին «Ա1+» հեռուստաընկերությունը փակելու մասին հարցին։ Լրագրողը հիշեցրեց, որ իր ասուլիսում ՀՀ երկրորդ նախագահ Ռոբերտ Քոչարյանն ասաց, թե ծրագիրը ձեռագիր էր գրված։
Տիգրան Հակոբյան
Տիգրան Հակոբյանն ասաց, որ նախօրեին արտահոսք էր եղել, որ «Ա1+»-ին լիցենզիայից զրկելու են եւ ինքն այցելել էր հեռուստաընկերություն ու ծանոթացել ծրագրին։
«Ես չեմ խոսում՝ դա լավն էր, թե վատն էր, ժամանակ շատ է անցել։ Ես չգիտեի նույնիսկ իրենց մրցակիցների ծրագրերը, բայց այն կարող եմ ասել՝ ինչ գիտեմ․ դա ձեռագիր չէր, այն ժամանակվա համեմատ լավ տեխնիկական հագեցվածություն ուներ «Ա1+»-ը»,- ասաց Տիգրան Հակոբյանը։
Հակադարձելով Ռոբերտ Քոչարյանի այն դիտարկմանը, որ «Ա1+»-ը փոքր լսարան ուներ, նաեւ հավելեց, որ եթե փոքր լսարան ունենար, հեռուստաընկերությունը փակելու աղմուկն այդքան մեծ չէր լինի, իսկ այդ աղմուկը ընդդիմության բարձրացրած աղմուկը չէր, այլ հասարակության բարձրացրածը։
Կարդացեք նաև
«Իհարկե, պետք չէր փակել»,- ասաց նա։
Մանրամասները՝ տեսանյութում
Նելլի ԳՐԻԳՈՐՅԱՆ
Լուսանկարում՝ 2002-ի բողոքի ցույցերից՝ ընդդեմ «Ա1+»-ի եթերազրկման: Պաստառը պահողներից մեկը ներկայիս ԿԸՀ նախագահ Վահագն Հովակիմյանն է:
