«Մինչեւ ապրիլի 15-ն իրականացնելու ենք հանրային հանդիպումներ, մենք նախապատրաստվում ենք հաջորդ հանրահավաքին։ Սա հայ լինելու, ազգային հարց է, ավելի պետք է կրկնապատկվենք՝ ցույց տալու, որ միասնություն կա մեր օրակարգի բոլոր հարցերի շուրջ»,- Ազատության հրապարակում ՀՅԴ անդամների հետ հանդիպումից հետո լրագրողներին ասաց Արցախցիների իրավունքների պաշտպանության խորհրդի անդամ Անաստաս Իսրայելյանը։
Նա նշեց, որ Ազատության հրապարակում իրենց հետ քննարկումներ անցկացնող բոլոր քաղաքական ուժերն ու անհատները ողջունում են այս պայքարն ու պատրաստակամություն հայտնում աջակցել։ Իսրայելյանն ասաց, որ այսօրվա իրավիճակի պատասխանատուն ՀՀ իշխանությունն է, իրենց բացթողումների ու ոչ հայանպաստ որոշումների պատճառով է ժողովուրդը եկել հասել այս օրվան։ «Հիմա այստեղ քննարկումների պահանջն այն է, որ դուք ժողովրդի ձայնը լսեք։ Դուք, իշխանության ներկայացուցիչներ, եթե ծառայում եք ժողովրդին, առաջին հերթին պետք է հաշվի առնեք ազգի շահերը։ Խորհուրդ ենք տալիս, որ բոլոր խոսքերն ասելիս հազար անգամ մտածեն, հետո նոր մոտեցումներ ներկայացնեն, որովհետեւ այստեղ խոսքը գնում է միասնության մասին։ Ո՞նց կարող է ղեկավարը լինել ազգի ներկայացուցիչ ու միասնության մոտեցումները չընդունել։ Տարանջատելու փորձեր կան, բայց մենք գնալու ենք այն ուղղությամբ, որ ազգային միասնությունը կարողանանք ամրագրել»,- ասաց նա։
Անաստաս Իսրայելյանը հավելեց, որ Հայաստանի կուսակցությունների, ՀԿ-ների եւ անհատների հետ եւս հանդիպումներ են անցկացվելու, սահմանափակումներ չկան։
Մանրամասները՝ տեսանյութում
Կարդացեք նաև
Ռոզա ՀՈՎՀԱՆՆԻՍՅԱՆ
