«Կեղծ մտավորականության, կեղծ քաղաքավարության ու ամեն ինչի ներքո ոմանք ուզում են խխունջի նման պարփակված մնալ սենյակում, իրենց տներում ու ոչնչի չխառնվել: Ուրեմն հիշեք, որ 1915թ ապրիլի 24-ին հենց մտավորականները դարձան թուրքի յաթաղանից ընկած առաջին զոհերը, հիմա կարծում եք դուք նրանցից լա՞վն եք»,- «Հայելի» ակումբում կայացած ասուլիսում նշեց Հայաստանի մարդու իրավունքների նախկին պաշտպան Լարիսա Ալավերդյանը՝ դիմելով Հայաստանի ճակատագրի հանդեպ չեզոքություն ու անտարբերություն ցուցաբերող մտավորականներին ու հասարակական գործիչներին:
«Ես բոլորին ցանկանում եմ երկար կյանք, եթե իրենց իղձերի մեջ կա, որ իրենց շիրիմը Պանթեոնում լինի, թող իրականացվի: Բայց նաեւ կրկնում եմ՝ ապրիլի 24-ին թուրքական յաթաղանը սկզբից իրական մտավորականությանն է ոչնչացրել, ինչից խոսելու ունակությունը կորցրել է Կոմիտասը: Նա ոչ թե խելակորույս է եղել, այլ պարզապես լլկվել է…Իմ սիրելի գրող Զոհրապն էլ դրան չէր հավատում, տեսանք, թե ինչ եղավ: Այսօր պետք է ոչ թե մտածենք այն մասին, թե ով որտեղ պետք է թաղվի, այլ այն մասին, որ ամեն մեկիս վրա արյուն կա:
Ես էլ ձեզ հետ միասին կրում եմ պատասխանատվություն նրա համար, ինչ տեղի է ունեցել 2018-ից սկսած: Մանավանդ նրանք են կրում պատասխանատվություն, որոնք չէին գնում ընտրելու, որովհետեւ չէին զբաղվում քաղաքականությամբ: Այդ դեպքում քաղաքականությունը ձե՛զ է օգտագործում, քաղաքականությունը ձեր ձեռքով է ամեն ինչ արել, ներառյալ զոհերը 2020 թվականի պատերազմի »,- ասաց Լարիսա Ալավերդյանը:
Նրա ձեւակերպմամբ, «Ոչ թե թուրք տմարդին է մեղավոր, այլ մենք, մեր վիճակի պատճառները մեր մեջ են, եւ բանալին, եւ ճանապարհը, եւ միջոցները մեր ձեռքին են»:
Կարդացեք նաև
Գոհար ՀԱԿՈԲՅԱՆ
