«Փաստինֆո». Քաղաքագետներ Սուրեն Սահակյանը և Արեգ Քոչինյանը հայտնվել են մեղադրյալի աթոռին՝ Հանրային ՀԸ եթերում ծեծկռտուքի համար։ Դեպքը տեղի է ունեցել 2024թ․ փետրվարի 23-ին՝ «Հանրային» ՀԸ տաղավարում «Տարբեր կարծիքներ Տաթև Դանիելյանի հետ» հաղորդաշարի շրջանակներում բանավեճի ժամանակ։
Սուրեն Սահակյանը և Արեգ Քոչինյանը հնչեցված արտահայտությունների վերաբերյալ պարզաբանումներ ստանալու նպատակով դուրս են եկել ՀԸ շենքից, գնացել բակային հատված, որտեղ վեճի ժամանակ հարվածներ են հասցրել միմյանց։ Ըստ մեղադրանքի՝ Սուրեն Սահակյանը ձեռքերով և ոտքերով բազմաթիվ հարվածներ է հասցրել Արեգ Քոչինյանի ուսերին, կրծքավանդակին, դեմքին, դաստակին` վերջինիս պատճառելով ֆիզիկական ցավ, իսկ Արեգ Քոչինյանը՝ ձեռքերով և ոտքերով բազմաթիվ հարվածներ է հասցրել Սուրեն Սահակյանին՝ վերջինիս պատճառելով առողջությա թեթև վնասի հատկանիշներ չպարունակող՝ մարմնական վնասվածք: Թե՛ Սուրեն Սահակյանին, թե՛ Արեգ Քոչինյանին մեղադրանք է ներկայացվել ՀՀ քրեական օրենսգրքի 195-րդ հոդվածի 1-ին մասով՝ ֆիզիկական ներգործության հատկանիշներով։ Քրեական գործն այժմ Երևանի ընդհանուր իրավասության քրեական դատարանում է, մակագրվել է դատավոր Գարիկ Աբելյանին։
Ի․ Ս․
