Արցախցիների իրավունքների պաշտպանության խորհրդի անդամներն այսօր կառավարությունում դարձյալ հանդիպել են փոխվարչապետ Տիգրան Խաչատրյանի հետ։
Հիշեցնենք, որ նախորդ հանդիպումից արցախցիները դժգոհ էին եւ հայտարարեցին, որ պայքարը շարունակում են։ Խորհրդի անդամ Նժդեհ Իսկանդարյանը լրագրողների հետ զրույցում ասաց, որ այսօր դարձյալ հանդիպել են փոխվարչապետի հետ։ Հարցին, թե ի՞նչ է փոխվել, որ արցախցիների ներկայացուցիչներին նորից ընդունել են կառավարությունում, նա պատասխանեց, որ ճնշումներն իրենց արդյունքը տալիս են։
Նա ասաց, որ այսօրվա հանդիպման ժամանակ քննարկել են սոցիալական հարցերը եւ պայմանավորվել ստեղծել մասնագիտական խմբեր՝ բնակարանային ծրագրի վերաբերյալ քննարկումներ ունենալու համար։ «Պայմանավորվել ենք ստեղծել փորձագիտական խմբեր, առաջիկայում ներկայացնելու ենք մեր առաջարկությունները, լսելու ենք իրենց դիտարկումները, որից հետո խորհուրդն իր դիրքորոշումը կհայտնի»,- նշեց նա։
Արցախցիների իրավունքների պաշտպանության խորհրդի անդամ Ապրես Մարգարյանը մանրամասնեց՝ կառավարությունից ասել են, որ այսօր պատրաստ են երեք փորձագիտական խմբեր ստեղծել ու աշխատանք իրականացնել արցախցիների բարձրաձայնած խնդիրների ուղղությամբ։ «Հարցադրում արեցինք 12 կետերի մասով, պատասխանեցին, որ այս փուլում պատրաստ ենք երեք փորձագիտական խմբի մասով աշխատանքներ կատարել՝ սոցիալական- զբաղվածության ծրագրի, բնակարանային ծրագրի եւ, շատ կարեւոր է, մշակութային ժառանգության մասով»,- նշեց նա։
Կարդացեք նաև
«Վերածնվող Արցախ» շարժման ղեկավար Անաստաս Իսրայելյանն էլ լրագրողներին հայտնեց, որ այսօրվանից Ազատության հրապարակում մեկնարկել են քննարկումներ տարբեր քաղաքական ուժերի եւ ՀԿ-ների ներկայացուցիչների հետ, որոնք կտեւեն մինչեւ ապրիլի 15-ը։ Այսօր անցկացվող փակ հանդիպմանը մասնակցում են Արցախի Ազգային ժողովում ներկայացված քաղաքական ուժերի ներկայացուցիչները։
Անաստաս Իսրայելյանն ասաց, որ ապրիլի 15-ին կհայտարարեն հաջորդ հանրահավաքի անցկացման օրվա մասին։ Ըստ նրա՝ քաղաքական ուժերի հետ քննարկումները արցախցիների ներկայացրած 12 կետանոց պահանջագրի շրջանակներում են, օրակարգից շեղում չի լինելու։
Ռոզա ՀՈՎՀԱՆՆԻՍՅԱՆ
