Սլովակիայի մայրաքաղաք Բրատիսլավայում մեկնարկել է ըմբշամարտի Եվրոպայի առաջնությունը, որին մասնակցում են նաեւ Հայաստանի ազգային հավաքականները:
Այսօր պայքարը սկսել են ազատ ոճայինները: Հայաստանից մրցագորգ մտել են 57 կգ քաշային Մանվել Խնձրցյանը, 65 կգ՝ Վազգեն Թեւանյանը, 70 կգ՝ Արման Անդրեասյանը, 79 կգ՝ Հայկ Պապիկյանը եւ 97 կգ՝ Գուրգեն Սիմոնյանը: Մանվելը, Հայկը եւ Գուրգենը տանուլ են տվել առաջին գոտեմարտերը:
70 կգ քաշային կարգում Արման Անդրեասյանը որակավորման փուլում 10:0 հաշվով պարտության է մատնել լեհ Մաթեուշ Լուժչինսկուն, քառորդ եզրափակչում 4:0 հաշվով առավելության է հասել ուկրաինացի Օլեքսիյ Բորուտայի նկատմամբ եւ կիսաեզրափակչում գոտեմարտելու է Վրաստանի ներկայացուցիչ Ակակի Կեմերտելիձեի հետ:
Վազգեն Թեւանյանը 65 կգ քաշային կարգում պայքարը սկսել է 1/8 եզրափակչից, որտեղ հաղթել է Ըմբշամարտի միջազգային միության դրոշի ներքո հանդես եկող Իսլամ Հուսեյնովին՝ 3:0: Սակայն նա քառորդ եզրափակչում համառ պայքարում 2:3 հաշվով զիջել է նույնպես մարզաձեւի միջազգային միության մարզազգեստով հանդես եկող Իբրահիմ Իբրահիմովին:
Կարդացեք նաև
Աշոտ ՀԱԿՈԲՅԱՆ
