Բանկային համակարգի զեղծարարություններից տուժած քաղաքացիները իրենց բողոքի ցույցն այսօր շարունակել են նաեւ Քննչական կոմիտեի շենքի դիմաց:
«Կասեցրեք բանկային անպատժելիությունը», «Մեր հույսը դուք եք» եւ նմանատիպ գրություններով պաստառները պարզած՝ քաղաքացիները կոմիտեի շենքի աստիճանների վրա սպասում էին, թե կոմիտեից ով կընդունի իրենց:
Մինչ այդ «Հանրային վերահսկողություն» հ/կ ղեկավար Մհեր Կարագյոզյանը լրագրողներին ասաց. «Երբ մենք կներկայացնենք մեր պահանջները, կամփոփենք այս տասնօրյա ժամանակահատվածում ինչ արդյունքներ են եղել: Մեզ հետ դիմումներ ենք բերել, որ մուտք անենք: Նախապես ներկայացրել ենք 30 դիմում, բերել ենք մեզ հետ եւս 20 դիմում: 30 դիմումի արդյունքում ինչ իրավիճակ է ստացվել: Բանկերում ու ֆինանսական կազմակերպություններում իրականացվող զեղծարարությունների հետեւանքով մի շարք դժգոհություններ ենք հայտնել դատաիրավական համակարգից: Մեր դիմումների արդյունքում տարբեր քաղաքացիների մասով ունենք տարբեր քննիչների ոչ բավարար գործողություններ, նրանց կողմից պատշաճ ջանասիրություն չի եղել, որոնց մասով քննչական կոմիտեն ծառայողական քննություններ է սկսել ու փորձեց խնդիրները շտկել: Փոխվեց քաղաքացիների դատավարական կարգավիճակը, կոմիտեն կարողացավ բացահայտել, թե որտեղից են գողացվել զեղծարարների կողմից այդ գումարները: Կոմիտեն բացահայտեց, որ գումարները գողացվել են բանկերից ու տուժող կողմը բանկերն են: Ինչի վրա հիմնվելով՝ կարող ենք ասել, որ բանկերի ու ֆինանսական կազմակերպությունների կողմից ներկայացվող պահանջները քաղաքացիներին անհիմն են: Իհարկե, բանկերն ընդվզում են այդ որոշումների դեմ»:
Կարագյոզյանը նկատեց նաեւ, որ եթե առավոտյան ցույցի ժամանակ միայն երեք բանկի անուն էր տալիս, որոնք զեղծարարությունների թվով աչքի էին ընկնում, ապա այս պահին ցանկանում է այդ շարքը համալրել եւս մեկով. «Տիկինը Հայէկոնոմբանկում կորցրել է 53.000 դոլար 2024-ին: Նման հատուկենտ դեպքեր ունենք, հույս ունենք՝ այդ բանկերի հետ համագործակցելով, այդ խնդիրները լուծում կստանան»:
Կարդացեք նաև
Հիշեցնենք, որ այսօր բանկային համակարգի զեղծարարություններից տուժած մի խումբ քաղաքացիներ Արդշինբանկի գլխամասային գրասենյակի դիմաց բողոքի ցույց են արել:
Արփինե ՍԻՄՈՆՅԱՆ
