Շախմատի ակադեմիայում կայացավ լրագրողների միջեւ շախմատի 10-րդ մրցաշարը, որն ավանդաբար կազմակերպում է Արտասահմանյան թղթակիցների ասոցիացիան: Հոբելյանական մրցաշարի հովանավորը Երեւանի քաղաքապետարանն էր, կային նաեւ աջակցող ընկերություններ:
Մասնակիցները, որոնք ներկայացնում էին 13 լրատվամիջոցներ, խաղացին արագ շախմատի ժամանակացույցով եւ կանոններով. Պարտիայի համար 10 րոպե եւ լրացուցիչ 5 վայրկյան ամեն մի քայլի համար: Հաղթողն ու մրցանակային տեղ զբաղեցնող լրագրողները ստացան համապատասխան գավաթներ, պատվոգրեր եւ գումարային մրցանակներ: Սահմանվել էին նաեւ անվանակարգային մրցանակներ:
Հետաքրքիր պայքարի արդյունքում, մինչեւ նախավերջին փուլն ամեն բան դեռ անորոշ էր, հաղթեց «Գոլոս Արմենիի» թերթի լրագրող Վադիմ Մկրտչյանը: Երկրորդ տեղն զբաղեցրեց Արարատ Պետրոսյանը՝ «Արմենպրեսի» գլխավոր խմբագրի տեղակալ, երրորդը՝ Նորայր Շողիկյանը՝ Արդարադատության նախարարության մամուլի քարտուղար: Մրցանակները հանձնեց գրոսմայստեր Շանթ Սարգսյանը:
Կարդացեք նաև
Մրցաշարի կազմակերպիչ, Արտասահմանյան թղթակիցների ասոցիացիայի նախագահ Տիգրան Հովհաննիսյանը Aravot.am-ին ասաց. «Գրանցվել էր 16 լրագրող: Նրանց ճնշող մեծամասնությունը մշտապես մասնակցում է արդեն ավանդական դարձած այս մրցաշարին եւ կարելի է ասել, որ ձեւավորվել է յուրահատուկ շախմատային ընտանիք: Հայաստանում լրատվամիջոցների միջեւ տարբեր մարզաձեւերից մրցումներ կազմակերպվել եւ կազմակերպում են: Այդ նախաձեռնությունների հեղինակներից մեկն էլ «Առավոտն» է եղել: Ես էլ որոշեցի շախմատային մրցակցություն կազմակերպել՝ հաշվի առնելով, որ շախմատը Հայաստանում տարածված ու սիրված է եւ տարբեր ոլորտները՝ բանկային համակարգ, դեսպանատներ եւ այլն, շախմատի մրցումներ կազմակերպում են: Եվ այն, որ այս տասը տարիների ընթացքում մեր մրցաշարը հետաքրքրությունը չի կորցնում, դրա վկայությունն է: Ավելին ասեմ, քանի որ մասնակիցների մի մասը բավականին բարձր խաղային որակներ ունեն, այսօր առաջարկ եղավ մրցաշարն այսուհետեւ անցկացնել երկու խմբով՝ ուժեղների եւ սիրողական մակարդակի: Ամենայն հավանականությամբ հետագայում այդպես էլ կվարվենք»:
Մրցաշարի պատմության մեջ առաջին անգամ մասնակցության հայտ ներկայացրել էր նաեւ գեղեցիկ սեռի ներկայացուցիչ՝ Երեւանի կենդանաբանական այգու մամուլի եւ հասարակայնության հետ կապերի պատասխանատու Լուսինե Գրիգորյանը: Aravot.am-ը զրուցեց նաեւ նրա հետ:
-Քանի որ առաջին անգամ է գեղեցիկ սեռի ներկայացուցիչը «համարձակվել» ձեռնոց նետել տղամարդկանց, հետաքրքիր է իմանալ, թե շախմատի հետ ի՞նչ առնչություն ունես:
-Այո առաջին անգամ եմ մասնակցում: Խաղում եմ սիրողական մակարդակով: Ուղղակի շախմատը իմ սիրելի հոբբին է: Այն մարզում է ուղեղս: Հաճույք եմ ստանում, երբ ինչ-որ ստրատեգիա եմ մշակում եւ հաջողության եմ հասնում: Իսկ խաղալ սովորել եմ փոքր հասակում, երբ երեկոյան տանը խաղում էի մայրիկիս եղբայրների հետ:
-Նաեւ առաջին անգամ ես ֆիզիկապես մասնակցում մրցաշարի ու միանգամից մրցակիցներդ հասուն տղամարդիկ են: Ինչպե՞ս ես քեզ զգում նրանց շրջապատում: Դժվար չէ՞:
-Հետաքրքիր է: Պայքարը դեռ շարունակվում է, բայց մեկ հաղթանակ արդեն գրանցել եմ: Ես սովորաբար խաղում եմ օնլայն տարբերակով: Ու, թերեւս, չկարողանամ ասել՝ նման ձեւաչափով տղաների հե՞տ է դժվար, թե՞ աղջիկների:
Աշոտ ՀԱԿՈԲՅԱՆ
