Պռոշյան եւ Քասախ համայնքների բնակիչները բողոքի փակել էին Աշտարակ տանող ճանապարհը: Նրանք բողոքի գործողություններ են իրականացնում տրանսպորտի համար 25 եւ 59 գծերի կրճատման եւ նոր՝ ավելի թանկ երթուղու դեմ։
Նոր երթուղին սպասարկելու է «Մուլտիտրանսպորտ» ընկերությունը՝ 250 եւ 200 դրամ արժեքով, եւ այս պարագայում տրանսպորտը հասնելու է մինչեւ Ֆիզիկայի ինստիտուտ: Բացի դրանից, վերջին տրանսպորտը քաղաքից շարժվելու է 19:30-ին։ Ցուցարարները նշում են, որ բացի թանկացումը, մեծ դժվարությամբ աշխատանքի հասնելուն զուգահեռ՝ եւս մեկ խնդիր է լինելու երեկոյան ժամերին տուն հասնելը:
Հավաքված մարդկանց խնդրի հասցեատերերը հավաստիացրին, որ մինչեւ հարցի լուծումը գոնե 25 համարի տրանսպորտը կգործի: Որոշվեց, որ երկու համայնքներից փոքր պատվիրակություն կհանդիպի տրանսպորտի եւ կապր նախարարի տեղակալի հետ: «Եթե չգործեց, երկուշաբթի օրը մեր հանդիպումից հետո հենց իրենց առաջ, հատկապես որ իրենցից ոչ մի վախենալու բան չունենք, շատ էլ, աթոռ են զբաղեցնում, մեր ասելիքը կասենք ու կոչ կանենք դուրս գալ փողոց, հերիք եղավ, բոլ եղավ»,-ասաց ցուցարարներից մեկը:
«Ես Պռոշյանի վերջում եմ ապրում, գազելը դիմացն է կանգնում, 40 րոպե ոնց պիտի քայլեմ, որ հասնեմ գազելին, որ հետո էլ հասնեմ աշխատանքի: 25 համարը լավ էլ աշխատում էր, մարդիկ նորմալ գնում էին աշխատանքի: Իսկ ավել 100 դրամն այսօր յուրաքանչյուրի համար մեծ գումար է»,-ասաց զայրացած մի տիկին:
Կարդացեք նաև
«Կայլասկաներով ենք երեխեքին բերելու շարենք էստեղ, եթեր հարցը չլուծվի, տեսնենք ինչ են անելու»,-հավելեց մեկ ուրիշը:
«Ես հայ կին եմ, ինձ հաճելի չէ ճանապարհ փակելը, բայց ուրիշ միջոց չկա, մեզ ուղղակի մղել եք դրան: Հիմա մենք հետ ենք քաշվում, բայց չմտածեն, թե փափուկ բարձ դրեցին մեր գլխի տակ, եթե խնդիրը չլուծվեց, ավելի վատ քայլերի ենք դիմելու»,-ասաց ցույցի մասնակիցներից մեկը:
Բողոքի գործողություններին մասնակցում էին նաեւ հաշմանդամություն ունեցող անձինք, նրանք հարց էին տալիս «պադավատով» ու երբեք հանրային տրանսպորտից չօգտվող պաշտոնյաներին ՝ իրենց փոքր թոշակով հաց ու դեղ գնե՞ն, թե թանկացած տրանսպորտի համար վճարեն:
«7000 ընտրող ունի Պռոշյանը, թող 2000 հոգի հավաքվեր քայլերթով իջնեինք Երեւան, 25 համարը պիտի գործի. եթե չգործեց, վախենալու բան չունենք»,-ասում էր մի տղամարդ:
Մանրամասն՝ տեսանյութում
Գոհար ՀԱԿՈԲՅԱՆ
