«Ես նույնպես չեմ վստահում Նիկոլ Փաշինյանի իշխանությանը»,- այսօր «Սրբազան պայքարի» համակիրների կողմից շարունակվող «Չեմ վստահում Նիկոլ Փաշինյանի իշխանությանը» ստորագրահավաք նախաձեռնությանը միանալով՝ ասաց Արցախի «Արդարություն» կուսակցության նախագահ Հակոբ Հակոբյանը:
«Համայն հայ ժողովուրդը երբեւէ պետք է չմոռանա Հակարիի կամուրջի պատմությունը: Մասնավորապես արցախահայությունը, որի ճնշող մեծամասնությունն անցավ այդ կամուրջն ու անպատվությունը: Քանի դեռ Հայաստանի իշխանությունները ներկայացվում են Նիկոլ Փաշինյանի դեմքով, այդ վտանգը կախված է մեր մնացած տեղամասերի վրա: Ոչինչ չկա անելու միայն թե մերժել ու չվստահել այս իշխանություններին, փորձել ամեն ինչ անել, որ այս իշխանություններն օր առաջ հեռանան»,- ասաց Հակոբյանը:
Իսկ Փաշինյանը, ըստ Հակոբյանի, կհեռանա, երբ համաժողովրդական ճնշումն այն աստիճանի լինի, որ Փաշինյանը սկսի վախենալ ոչ թե Ալիեւից, Էրդողանից, այլ՝ սեփական ժողովրդից:
Կարդացեք նաև
Արցախի ԱԺ պատգամավոր Դավիթ Գալստյանն էլ, որը եւս մասնակցեց իշխանություններին մերժող ստորագրահավաքին ասաց, որ երազում է վերադառնալ հայրենիք՝ Արցախ, իսկ Արցախ վերադարձն, ըստ նրա, անցնում է հզոր Հայաստանի միջով. «Ինչը օրվա իշխանություններն օրեցօր թուլացնում են: Պարտության խորհրդանիշ ունեցող իշխանությունների նկատմամբ ով վստահություն ունի, համոզված եմ՝ հիասթափվելու են»:
Ի դեպ, այսօր ուշ երեկոյան Բագրատ սրբազանն այցելեց արցախցիների իրավունքների պաշտպանության շտաբ:
Արփինե ՍԻՄՈՆՅԱՆ
