Գյումրու արտահերթ ՏԻՄ ընտրությունների օրը ձերբակալել էին Մարտուն Գրիգորյանի գլխավորած «Մեր քաղաքը» դաշինքի ցուցակում 25-րդ տեղը զբաղեցնող 71-ամյա Անահիտ Խլղաթյանին, 75-ամյա գյումրեցի Կիմա Հայրապետյանին ու նրա քեռու 90-ամյա դստերը։
Ազգային ժողովի պատգամավոր Մարտուն Գրիգորյանը, հենց նույն օրը մամուլի ասուլիս հրավիրելով, պատմել էր, որ 71-ամյա Անահիտ Խլղաթյանին (Գյումրիում առավել հայտնի է «Չոռնի Անո» մականվամբ) առևանգել են, տարել անհայտ ուղղությամբ։ Ըստ նրա, առողջական խնդիրներ ունեցող տարեց կնոջը փողոցից «գռքաշ» են տարել։
«Անահիտը ինձ նվիրված, հարազատ, ուժեղ կամքի տեր, անդավաճան մարդ է։ Ցավոք, նա առողջական խնդիրներ ունի ու լավ կլինի հաշվի առնեն։
Այս պահին թիրախավորում են այդ մարդկանց։ Նա ուժեղ է, անկախ տարիքից, դժվարություններից՝ նա կհաղթահարի․ ես էլ իր թիկունքին կանգնած եմ», -ասել էր պատգամավորը։
Կարդացեք նաև
Նա նաև նշել էր, որ Անահիտ Խլղաթյանը մեծ ընտրազանգված ունի, հետևաբար և նրան այդ պատճառով են թիրախավորել։
Ժամեր անց պարզվել էր, որ Անահիտ Խլղաթյանին ու 75-ամյա Կիմա Հայրապետյանին ձերբակալել էին կաշառք տալու ու ստանալու կասկածանքով, Հակակոռուպցիոն կոմիտեում նրանց մեղադրանք էր առաջադրվել ։ 90-ամյա կնոջը ազատ էին արձակել։
Ըստ քրեական վարույթի, դաշինքի ավագանու թեկնածուն 75-ամյա կնոջը խոստացել էր ընտրակաշառք՝ դաշինքի օգտին քվեարկելու, ընտրելու իրավունք ունեցող իր շրջապատի մարդկանց ներգրավելու, նրանց տվյալները հավաքագրելու ու թեկնածուին տրամադրելու համար։
Հրապարակվել էր մի տեսանյութ՝ օպերատիվ նկարահանմամբ ու հեռախոսային խոսակցության ձայնագրությամբ, որտեղ ենթադրյալ հանցանք կատարող անձինք ընտրողներին անվանել էին «դասարանցի երեխեք», նշել, որ հետևողական են լինելու, որպեսզի դասերից չբացակայեն, այսինքն՝ ի նկատի էին ունեցել քվեարկությանը պարտադիր մասնակցելը։
Ինչևէ, երկու տարեց կանանց 3 գիշեր անազատության մեջ պահելով՝ Հակակոռուպցիոն քրեական դատարանը կիրառել էր վարչական վերահսկողություն, որը հաղորդակցման ու տեղաշարժի որոշակի սահմանափակում է ենթադրում։
Նրանց շահերը պաշտպանող Արսեն Բաբայանն ու Ռուբեն Մելիքյանն այս գործն անվանել էին «տատիկների գործ»՝ պարզաբանելով, որ նրանք չեն ընդունում իրենց մեղսագրվող արարքը, մեղադրանքի հիմքեր գոյություն չունեն։
Նրանք նաև բարձրաձայնել էին, որ ձերբակալված տարեց կանանց նկատմամբ ճնշումներ են եղել, Անահիտ Խլղաթյանի գլխին հարվածել ու ասել են՝ «ցմահ նստելու ես, ի՞նչ ես գտել Մարտունի մեջ»:
Կիմա Հայրապետյանի շահերը պաշտպանող Ռուբեն Մելիքյանն էլ հեգնել էր, թե 75-ամյա կինը «դարի հանցագործն է»։
«Ինձ փող չեն տվել, ես ուրիշին փող չեմ տվել, ոչ էլ խոսացել եմ»,-լրատվամիջոցներից մեկին տված հարցազրույցում ասել էր 75-ամյա Կիմա Հայրապետյանը։
Մեղքը չի ընդունել նաև Անահիտ Խլղաթյանը։
Ի դեպ, նա Գրիգորյանների ընտանիքին պատկանող «Տրանս ակնթարթ» ՍՊԸ տնօրենն է։ Անահիտ Խլղաթյանը մամուլի ուշադրության կենտրոնում հայտնվել էր դեռ 2017 թվականի ԱԺ ընտրությունների ժամանակ, երբ Գյումրու Ավտոկայան թաղամասի «Զանգակ» տնակային մանկապարտեզի դիմաց (մանկապարտեզն ընտրատեղամաս էր), թունդ վիճաբանության մեջ էր մտել Վարդան Ղուկասյանի թիկնապահի ընտանիքի հետ՝ պնդելով, որ լավ է անում, մարդկանց տներից քվեարկության է բերում, դա օրենքի որևէ խախտում չէ։
«Արել եմ, լավ եմ անում, տներից բերել եմ, էլի պիտի բերեմ, խնդիր էլ չեմ տեսնում»,-ասել էր նա։
Նունե ԱՐԵՎՇԱՏՅԱՆ
