«Երկրորդ ղարաբաղյան պատերազմից հետո Ադրբեջանի կողմից Գորիս-Կապան ճանապարհի գրավումը դժվարություններ ստեղծեց Իրանի համար»։ Այս մասին Երեւանում Հայաստան-Իրան բարեկամությանը նվիրված միջոցառմանն ասաց իրանցի գործարար Թալեբփուր Մուստաֆան։
«Այլընտրանքային ճանապարհը թույլ ենթակառուցվածք է, դժվարանցանելի», – նշեց Մուստաֆան՝ ընդգծելով Հայաստանն ու Իրանը միմյանց կապող ենթակառուցվածքների զարգացումը եւ այդ հարցում քայլեր ձեռնարկելու իր երկրի պատրաստակամությունը։
Հյուսիս-Հարավ ճանապարհատրանսպորտային միջանցքի համատեքստում գործարարն ընդգծեց Հայաստանի ռազմավարական կարեւորությունն Իսլամական Հանրապետության համար։
«Պարսից ծոցը Սեւ ծովին կապելու համար Հայաստանը նշանակություն ունի», – մատնանշեց Մուստաֆան։
Կարդացեք նաև
«Զանգեզուրի միջանցքը»՝ խոչընդոտ Հյուսիս-Հարավին
Ըստ գործարարի՝ Հյուսիս-Հարավի իրագործմանն այս պահին խոչընդոտում է «Զանգեզուրի միջանցքը», որը «թուրք-ադրբեջանական ծրագիր է, եւ խաթարում է ՀՀ-ԻԻՀ կապը»։
«ԻԻՀ-ն բազմիցս նշել է, որ հայ-իրանական սահմանի դեմ որեւէ ոտնձգություն կարմիր գիծ է իր համար», – իր երկրի պաշտոնական դիրքորոշման մասին հիշեցրեց իրանցի գործարարը։
Տարածաշրջանի տերերը տարածաշրջանի երկրներն են
Մուստաֆայի համոզմամբ՝ տարածաշրջանում արեւմտյան ազդեցության տարածման եւ ակտիվացման համատեքստում ՀՀ-ԻԻՀ հարաբերությունները խանգարելու փորձեր են նկատվում։
«Հայաստանի եւ Իրանի ժողովուրդները նման բան թույլ չեն տալու», – վստահ է Մուստաֆան։
Նա շեշտեց՝ տարածաշրջանի տերերը տարածաշրջանի երկրներն են։
Անդրադառնալով դեպի Ռուսաստան իրանական տարանցումներին՝ նա փաստեց, որ Ադրբեջանի տարածքով տարանցումը երբեմն խնդիրների է բախվում, քանի որ լինում են ձգձգումներ, որոնք վնասում են հիմնականում կաթնամթերային փոխադրումները։
«Տարանցման համար Հայաստանը կարող է ավելի բարեկամական երկիր դառնալ Իրանի համար», – կարծում է Թալեբփուր Մուստաֆան։
Գործարարի ելույթը՝ ստորեւ
Արսեն ԱՅՎԱԶՅԱՆ
