Փոխվարչապետ Տիգրան Խաչատրյանի եւ Արցախցիների իրավունքների պաշտպանության խորհրդի անդամների հանդիպումից հետո արցախցիները քննարկում անցկացրեցին Ազատության հրապարակում։
Քննարկումից հետո խորհրդի անդամ Անաստաս Իսրայելյանն ասաց, որ վաղը հայտարարություն կանեն հետագա գործողությունների մասին։ «Վաղը օրվա ընթացքում ասելու ենք, թե օրը, որ ժամին եւ որտեղ ինչ գործողություններ են լինելու։ Քննարկումների արդյունքում եկել ենք մի եզրակացության, որ արդեն ստիպված ենք»,- ասաց նա։
Խորհրդի անդամները հայտարարեցին, որ մարդիկ պետք է ոտքի կանգնեն, ասացին, որ եթե մարտի 29-ի հանրահավաքի մասնակիցների թիվը մի քանի անգամ գերազանցող հավաք լինի, հաստատ արդյունք կգրանցվի։
«Եկել ենք եզրակացության, որ մենք շարունակում ենք պայքարը։ Բոլորդ զարթնեք ու համախմբված տեր կանգնեք մեր իրավունքներին»,- ասաց Անաստաս Իսրայելյանը։
Կարդացեք նաև
Մարտի 29-ին հրավիրած հանրահավաքում Արցախցիների իրավունքների պաշտպանության խորհուրդը պահանջագիր էր ներկայացրել Հայաստանի կառավարությանը։ Այսօր կառավարությունում նրանց հանդիպման էին հրավիրել, սակայն հանդիպման արդյունքները չգոհացրեցին արցախցիներին։
Ռոզա ՀՈՎՀԱՆՆԻՍՅԱՆ