«Իրանը հարգում է Հայաստանի վարած արտաքին քաղաքականությունը»։ Երեւանում հայ-իրանական բարեկամությանը նվիրված միջոցառման ժամանակ այս մասին հայտարարել է մեր երկրում Իրանի արտակարգ եւ լիազոր դեսպան Մեհդի Սոբհանին։
Միջոցառումը մեկնարկեց հենց դեսպանի ողջույնի խոսքով։ Դիվանագետն ընդգծեց, որ հայ-իրանական հարաբերությունները հիմնված են փոխըմբռնման վրա։
Մանրամասնելով, թե ինչ նկատի ունի «փոխըմբռնում» ասելով՝ դեսպան Սոբհանին ընդգծեց՝ հարաբերություններին պետք է նայել երկարաժամկետ կտրվածքով։
«Եթե ինչ-որ բան է պատահում, դա չպետք է ազդի մեր հարաբերությունների վրա․․․պետք է կարողանանք տնօրինել մեր հարաբերությունները։ Եթե լինում են անհասկանալի հարցեր, պետք է լուծենք այդ հարցերը, որպեսզի այդ անհասկանալի հարցերը չվերածվեն տարաձայնությունների, խնդիրների», – իր խոսքում նշել է Սոբհանին։
Կարդացեք նաև
Հարաբերությունների երեք հարթություն
Ավելի խորանալով հայ-իրանական հարաբերությունների բովանդակության մեջ՝ իրանցի դիվանագետը մատնացույց արեց երկու երկրների հարաբերությունների երեք հարթությունները․ աշխարհաքաղաքական, աշխարհատնտեսական եւ աշխարհամշակութային։
Սոբհանիի խոսքով՝ հայերն ու իրանցիներն ապրում են կողք-կողքի եւ ունեն փոխկապակցված շահեր եւ փոխադարձ ազդեցություն։ Նա հատուկ ընդգծեց, որ Հայաստանի Սյունիքի մարզի անձեռնմխելիությունը Իրանի շահերից է բխում։
Տնտեսության մասով դեսպանը նշեց՝ Իրանը եւ Հայաստանը փոխլրացնում են միմյանց։ Իրանը Հայաստանի համար կարող է դարպաս դառնալ դեպի հարավ՝ Պարսից ծոց եւ Հնդկաստան ձգվելու համար, իսկ Հայաստանն էլ՝ դարպաս Իրանի համար՝ հյուսիս՝ Սեւ ծով ձգվելու համար։
«Մենք Հայաստանը չենք դիտարկում զուտ որպես 3 միլիոնանոց շուկա, այլ հարթակ՝ ԵԱՏՄ 200 միլիոնանոց շուկա հասնելու համար», – ընդգծեց Իրանի դեսպանը։
Մեհդի Սոբհանին չմոռացավ արձանագրել, որ Հայաստանում Իրանի եւ Իրանի ժողովրդի հանդեպ առկա են չափազանց դրական տրամադրվածություններ։ Փոխադարձ դրական վերաբերմունք է առկա նաեւ Իրանում, որտեղ կա հայկական համայնք, որի ներկայացուցիչները, ինչպիսին է Լորիս Ճգնավորյանը, մեծ ներդրում են ունեցել Իրանի մշակույթի զարգացման գործում։
Դեսպան Սոբհանին կարեւոր համարեց նաեւ, որ Հայաստան-Իրան հարաբերությունները զարգանան ոչ միայն քաղաքականության բնագավառում, այլեւ ժողովրդական, զինվորական, մշակութային եւ այլ բնագավառներում։
Արսեն Այվազյան
