ՌԴ ԱԳՆ-ն մեկնաբանել է ԵՄ-ին Հայաստանի միանալու մասին օրենքի ընդունումը: Ինչպես հայտնում է «Ռիա»-ն, ՌԴ ԱԳ փոխնախարար Միխայիլ Գալուզինը հայտարարել է, հնարավոր չէ միաժամանակ լինել և՛ ԵԱՏՄ-ում, և՛ ԵՄ-ում, բայց դա Հայաստանի որոշելիքն է:
«Մենք համոզված ենք, որ անհնար է լինել միաժամանակ երկու հակադիր ասոցիացիաներում, ինչպիսին են ԵԱՏՄ-ն ու Եվրամիությունը»,- ասել է Գալուզինը։
Ըստ Գալուզինի՝ ԵԱՏՄ-ն հավասարազոր պետությունների ասոցիացիա է, մինչդեռ ԵՄ-ում տիրում են «ոչ կանոնադրական հարաբերություններ», որոնք հիմնված են «իրականությունից կտրված հակառուսական պատմությունների» վրա։
«Պաշտոնական Երևանը պետք է որոշի, թե որտեղ է իր համար ավելի լավ: Հուսով ենք՝ հայ հասարակությանը կբացատրվեն ԵԱՏՄ-ին անդամակցության բոլոր օգուտները և ԵԱՏՄ-ի հետ խզման հետևանքով կորուստների մասշտաբները, որպեսզի հայ հասարակությունն իրականության օբյեկտիվ պատկերացում ունենա»,- նշել է փոխնախարարը և հավելել, որ Հայաստանն ինքնիշխան պետություն է, որն ինքնուրույն է ընտրում իր զարգացման վեկտորը։
