Մարտուն Գրիգորյանը չի եղել եւ չի հանդիսանում ՀՀԿ անդամ․ այսօր կայացած ասուլիսում հայտարարեց ՀՀԿ գործադիր մարմնի անդամ, ԱԺ «Պատիվ ունեմ» խմբակցության պատգամավոր Տիգրան Աբրահամյանը՝ հիշեցնելով, որ Մարտուն Գրիգորյանը դաշինքով պատգամավոր է դարձել «Հայրենիք» կուսակցության քվոտայով։ Տիգրան Աբրահամյանը սա չի ասում՝ նվազեցնելու համար Մարտուն Գրիգորյանի դերը՝ իբրեւ քաղաքական գործիչ եւ մարդ, այլ նրա համար, որ ՀՀԿ-ն չի կարող իրեն իրավունք վերապահել ուղղորդելու նրան․ «Մենք չենք ցանկանում անել քայլեր, որոնք Մարտուն Գրիգորյանին խոցելի կդարձնեն։ Ինքը, իր ընտանիքը հստակ կեցվածք ունեն, դեռ ժամանակ կա, Մարտուն Գրիգորյանը կհայտարարի իր դիրքորոշումը, որը, վստահաբար, չի վնասի Հայաստանին, հայկական պետականությանը»։
Գյումրու ընտրություններին մասնակցելու որոշումը Մարտուն Գրիգորյանը ՀՀԿ-ի հետ չի քննարկել, դա իր եւ իր ընտանիքի որոշումն է եղել, ուստի այժմ էլ ՀՀԿ-ն չի կարող ազդել նրա որոշման վրա։
Տիգրան Աբրահամյանը նաեւ տեղեկացրեց, որ ՀՀԿ-ի կարծիքը Մարտուն Գրիգորյանին փոխանցել են, բայց ձեռնպահ են մնում դա հանրայնացնելուց, որպեսզի դա չդիտարկվի իբրեւ նրա վրա ճնշում, երրորդ ուժի կողմից միջամտություն։ Տիգրան Աբրահամյանը նկատեց՝ առանց այդ էլ վերջին օրերին շատ թիրախավորվեց Մարտուն Գրիգորյանը։ Թեման օգտագործվեց նաեւ ՀՀԿ-ին եւ Սերժ Սարգսյանին թիրախավորելու համար․ «Բայց մենք վաղուց ունենք իմունիտետ եւ որտեղ անհրաժեշտ է՝ պատասխանը վերադարձնում ենք համարժեք, երբեմն՝ ոչ այդքան համարժեք»։
Կարդացեք նաև
Գյումրիում, հետընտրական խոսույթից Տիգրան Աբրահամյանի մոտ տպավորություն է ստեղծվում, որ որոշ ուժերի ձեռնտու է ոչ թե որ համապատասխան ձայները տրվեն եւ Վարդան Ղուկասյանը քաղաքապետ դառնա, այլ չտրվեն այդ ձայները, ինչի արդյունքում՝ եւ Մարտուն Գրիգորյանը, եւ ՀՀԿ-ն թիրախավորվեն։ Այս ամբողջ ֆոնը, նա կարծում է, որ ստեղծվում է 2026-ի ընտրություններում ՀՀԿ-ի վրա ազդելու համար։
«ՀՀԿ-ն պատրաստ է ցանկացած պայքարի, ցանկացած բախման՝ ամենակոշտին էլ եւ մենք թույլ չենք տա, որ ՀՀԿ-ի կենսագրությունը ստվերվի։ ՀՀԿ-ն տարբեր փուլերում ունեցել է սխալներ, բայց հիմա հարցն օբյեկտիվ իրականությունն է։ Տպավորություն է, որ շատ ուժերի խնդիրը ոչ թե Նիկոլ Փաշինյանն է, այլ ՀՀԿ-ն»,- ասաց Տիգրան Աբրահամյանը։
Մանրամասները՝ տեսանյութում
Նելլի ԳՐԻԳՈՐՅԱՆ
Ընտրութիւններէն ի վեր Մարտուն Գրիգորյանի ՔՍՏՄՆԵԼԻ վարքագիծը, այսքան երկա՜ր՝ անհանդուրժելի լռութիւնը, առաւել՝ Ղուկասյանին ինչ լինելը, կը յանգեցնեն այն տրամաբանական եզրակացութեան որ, այս հաշուով, նախըտնրելի էր որ Փաշինյանին մարդը ստանար բաւարար թիւով աւագանիի աթոռներ, որպէսզի առանց այս ապուշիւթիւններին, դառնար քաղաքապետ, ու վերջ:
Մ. Հայդուկ Շամլեան