Գրեթե բոլոր լրատվականները պարբերաբար տպագրում են ոստիկանության ամփոփագրերից ամենահնչեղ տեղեկությունները, սակայն հազվադեպ է պատահում, երբ հիշեն այդ գործի մասին, «գնան» դրա հետեւից: Այդպիսի գործերից մեկն էլ երկու տարի առաջվա «Պարեկների բռնության գործն» է, որը լսվեց դատական երեք ատյաններով:
Վճռաբեկ դատարանը մարտի 21-ին ավարտեց Նարեկ Ադամյանի եւ Անդրանիկ Ավագյանի վերաբերյալ ՀՀ վերաքննիչ քրեական դատարանի` 2024 թվականի հունվարի 19-ի որոշման դեմ ՀՀ գլխավոր դատախազի տեղակալ Ա.Պողոսյանի վճռաբեկ բողոքի քննությունը: Մարտի 21-ի որոշմամբ` Նարեկ Ադամյանի վերաբերյալ ՀՀ վերաքննիչ քրեական դատարանի՝ 2024 թվականի հունվարի 19-ի որոշումը բեկանել է եւ օրինական ուժ տվել նրա վերաբերյալ Գեղարքունիքի մարզի առաջին ատյանի ընդհանուր իրավասության դատարանի՝ 2023 թվականի սեպտեմբերի 13-ի դատավճռին՝ Նարեկ Ադամյանին վերջնական թողնելով կրելու ՀՀ քրեական օրենսգրքի 452-րդ հոդվածի 3-րդ մասով նշանակված ազատազրկումը՝ 1 տարի 11 ամիս 27 օր ժամկետով։
Ըստ Վճռաբեկ դատարանի այս եռահատոր քրեական գործով իրավական գնահատականների` Վերաքննիչ դատարանը, մեղադրյալ Նարեկ Ադամյանի նկատմամբ ազատազրկման ձեւով նշանակված պատիժը պայմանականորեն չկիրառելով` թույլ է տվել ՀՀ քրեական օրենսգրքի 84-րդ հոդվածի ոչ ճիշտ կիրառում: Մինչդեռ առաջին ատյանի դատարանը, ինչպես Ա. Ավագյանի, այնպես էլ Ն. Ադամյանի նկատմամբ ազատազրկման ձեւով նշանակված պատիժը պայմանականորեն չկիրառելու հարցում եկել էր հիմնավոր եւ իրավաչափ հետեւության, եւ թույլ չի տվել նյութական կամ դատավարական օրենքի այնպիսի խախտումներ, որոնք կարող էին նրա կողմից կայացված դատական ակտը բեկանելու հիմք հանդիսանալ:
Վճռաբեկ դատարանը Անդրանիկ Ավագյանի վերաբերյալ ստորադաս դատարանների դատական ակտերը թողեց անփոփոխ:
Կարդացեք նաև
Ամեն ինչ սկսվել է 2023 թվականի մարտի 17-ին ՀՀ Գեղարքունիքի մարզի դատախազության ավագ դատախազ Վիգեն Մարտոյանի որոշումից` Նարեկ Ադամյանի նկատմամբ ՀՀ քրեական օրենսգրքի 452-րդ հոդվածի 3-րդ մասով հարուցել հանրային քրեական հետապնդում:
Տուժողները 3 պարեկներ էին:
ՀՀ Գեղարքունիքի մարզի Արծվանիստ բնակավայրում ծառայություն իրականացնող ՀՀ ՆԳՆ ոստիկանության պարեկային ծառայության Գեղարքունիքի մարզի գումարտակի 2-րդ վաշտի 2-րդ դասակի հրամանատար Գրիշա Գաբրիելյանի, նույն դասակի պարեկ Սամվել Սարգսյանի եւ կրտսեր պարեկ Դավիթ Հովհաննիսյանի՝ 2023 թվականի մարտի 15-ին՝ ժամը 22-ի սահմաններում, գյուղամիջյան ճանապարհով երթեւեկելու ժամանակ նույն բնակավայրի բնակիչ Նարեկ Ադամյանը կանգնած է եղել ճանապարհի միջնամասում եւ դուրս չի եկել ճանապարհից, պարեկային ծառայողների անցնելու ժամանակ սեռական բնույթի հայհոյանքներ է հնչեցրել նրանց հասցեին (ըստ ՀՀ ոստիկանության տարածած հաղորդագրության, նկատել են նույն բնակավայրի բնակչի, ով գտնվել է ճանապարհի միջամասում, դուրս չի եկել ճանապարհից, եւ այդ ընթացքում հայհոյել է ոստիկանների-Ռ.Մ.):
Պարեկային ծառայության աշխատակիցները վարչական իրավախախտումների վերաբերյալ օրենսգրքի 172.3 հոդվածի պահանջները խախտելու (ոստիկանության ծառայողին կամ զինծառայողին հրապարակայնորեն վիրավորելը՝ կապված նրա կողմից հասարակական կարգի պահպանության եւ հասարակական անվտանգության ապահովման պարտականությունները կատարելու հետ) համար փորձել են վարչական ձերբակալման ենթարկել Նարեկ Ադամյանին, սակայն ըստ առաջադրված մեղադրանքի, նա սկսել է հայհոյել ու քաշքշել նրանց:
Անդրանիկ Ավագյանը ձեռքերով հարվածներ է հասցրել Գրիշա Գաբրիելյանին, նույն բնակավայրի մեկ այլ բնակիչ էլ` Եփրեմյանը բռունցքով հարվածներ է հասցրել Սամվել Սարգսյանի դեմքի շրջանին՝ վերջիններիս պատճառելով ֆիզիկական ցավ։
2023 թվականի մարտի 17-ին ՀՀ Գեղարքունիքի մարզի դատախազության ավագ դատախազ Վիգեն Մարտոյանի որոշմամբ Անդրանիկ Ավագյանի նկատմամբ էլ ՀՀ քրեական օրենսգրքի 452-րդ հոդվածի 3-րդ մասով հարուցվել էր հանրային քրեական հետապնդում:
2023 թվականի օգոստոսի 1-ին քրեական գործը մեղադրական եզրակացությամբ ուղարկվել էր առաջին ատյանի դատարան, մակագրվել դատավոր Ա. Կարապետյանին։ 2023 թվականի սեպտեմբերի 13-ին առաջին ատյանի դատարանի դատավճռով վճռվել է. Նարեկ Ադամյանին մեղավոր ճանաչել ՀՀ քրեական օրենսգրքի 452-րդ հոդվածի 3-րդ մասով նախատեսված հանցագործության կատարման մեջ եւ նրա նկատմամբ պատիժ նշանակել ազատազրկման ձեւով՝ 2 տարի ժամկետով։ ՀՀ քրեական օրենսգրքի 74-րդ հոդվածի 3-րդ մասի հիման վրա մեղադրյալ Նարեկ Ադամյանի նկատմամբ ազատազրկման ձեւով նշանակված պատժին հաշվակցել 2023 թվականի մարտի 15-ից մինչեւ 2023 թվականի մարտի 17-ն ընկած ժամանակահատվածում արգելանքի տակ գտնվելու 3 օրը:
Նարեկ Ադամյանի պատժի կրման սկիզբը հաշվել նրան փաստացի արգելանքի վերցնելու պահից: Դատավճռի օրինական ուժի մեջ մտնելուց եւ դրա կատարումն ապահովելուց հետո Նարեկ Ադամյանի նկատմամբ որպես խափանման միջոցներ կիրառված գրավը եւ բացակայելու արգելքը վերացնել, իսկ գրավի գումարը վերադարձնել գրավատուին: Անդրանիկ Ավագյանին դատարանը մեղավոր է ճանաչել ՀՀ քրեական օրենսգրքի 452-րդ հոդվածի 3-րդ մասով նախատեսված հանցագործության կատարման մեջ եւ նրա նկատմամբ պատիժ նշանակել ազատազրկման ձեւով՝ 2 տարի ժամկետով։
ՀՀ քրեական օրենսգրքի 74-րդ հոդվածի 3-րդ մասի հիման վրա մեղադրյալ Անդրանիկ Ավագյանի նկատմամբ ազատազրկման ձեւով նշանակված պատժին հաշվակցել 2023 թվականի մարտի 15-ից մինչեւ 2023 թվականի մարտի 17-ն ընկած ժամանակահատվածում արգելանքի տակ գտնվելու 3 օրը:
ՀՀ քրեական օրենսգրքի 84-րդ հոդվածի հիման վրա Անդրանիկ Ավագյանի նկատմամբ ազատազրկման ձեւով նշանակված պատիժը պայմանականորեն չկիրառել եւ սահմանել՝ 2 տարի ժամկետով փորձաշրջան՝ այդ ժամանակահատվածում նրա նկատմամբ սահմանել պարտականություններ՝ առանց դատապարտյալի վարքագծի նկատմամբ վերահսկողություն իրականացնող իրավասու մարմնի համաձայնության Հայաստանի Հանրապետության տարածքը չլքելը եւ բնակության վայրը փոխելու դեպքում դատապարտյալի վարքագծի նկատմամբ վերահսկողություն իրականացնող իրավասու մարմնին սեղմ ժամկետում իր նոր բնակության վայրի հասցեն հայտնելը:
«Իմ անձի եւ իմ գործողությունների վերաբերյալ դատարանի հետեւությունները հիմնավորված եւ պատճառաբանված չեն, քանի որ քրեական գործի նյութերում առկա չէ իմ կողմից պարեկային ծառայության աշխատակիցներին հայհոյելու եւ նրանց նկատմամբ բռնություն գործադրելու փաստը հաստատող որեւէ ապացույց, հետեւաբար, իմ նկատմամբ պատժի տեսակը եւ չափը որոշելիս դատարանը սխալմամբ իմ անձին եւ ինձ մեղսագրվող արարքին՝ վերագրել է հանրային բարձր՝ վտանգավորության աստիճան»,- իր բողոքում նշել էր մեղադրյալ Նարեկ Ադամյանը:
Վճռաբեկ դատարանի առջեւ բարձրացված իրավական հարցը հետեւյալն էր. հիմնավորվա՞ծ են, արդյոք, մեղադրյալներ Ն. Ադամյանի եւ Ա. Ավագյանի նկատմամբ ՀՀ քրեական օրենսգրքի 452-րդ հոդվածի 3-րդ մասով ազատազրկման ձեւով նշանակված պատիժը պայմանականորեն չկիրառելու վերաբերյալ ստորադաս դատարանների հետեւությունները։ Վճռաբեկ դատարանը փաստեց, որ Վերաքննիչ դատարանը, մեղադրյալ Ն.Ադամյանի նկատմամբ ազատազրկման ձեւով նշանակված պատիժը պայմանականորեն չկիրառելով` բավարար չափով գնահատման չի ենթարկել մեղադրյալ Ն. Ադամյանին վերագրվող արարքի՝ հանրության համար վտանգավորության աստիճանն ու բնույթը, այն, որ «մեղադրյալը գործել է ուղղակի դիտավորությամբ՝ գիտակցելով, որ բռնություն է գործադրում իշխանության ներկայացուցիչների նկատմամբ»: Նշեմ, որ թե Ադամյանը, թե Ավագյանը նախկինում դատված չեն եղել, առաջին ատյանի դատարանում միջնորդել էին արագացված ընթացակարգով դատական գործընթաց, բնութագրվել էին դրական: Տուժողները մեղադրյալների նկատմամբ գույքային պահանջ չեն ներկայացրել:
Ռուզան ՄԻՆԱՍՅԱՆ
Հ.Գ.-Անցած տարի Սյունիքի մարզային քննչական վարչությունը Կապանի երկու բնակչի մեղադրանք առաջադրեց այն բանի համար, որ բռնել էին գիշերային հերթափոխով ծառայություն իրականացնող պարեկներից մեկի համազգեստից, հարվածել գլխարկին, պոկել համազգեստին ամարացված տեսանկարահանող սարքը, նետել, վնասելով այն: Այդ գործը նույնպես դատարանում է:
«Առավոտ» օրաթերթ
02.04.2025
