«Արմավիր» քրեակատարողական հիմնարկում պատիժ կրող ցմահ դատապարտյալ Արսեն Գասպարյանի հարազատները քիչ առաջ Aravot.am-ին տեղեկացրին, որ «Արմավիր» ՔԿՀ-ի պետ Գարիկ Ծատուրյանի հորդորով՝ դատապարտյալը դադարեցրել է հացադուլն ու ջրադուլը։
Հիշեցնենք՝ որ Արսեն Գասպարյանը արդեն 5 օր է՝ առողջական խնդիրների պատճառով դիմել էր ծայրահեղ այդ քայլին։ Դատապարտյալին վիրահատել էին ու տեղափոխել «Արմավիր» ՔԿՀ –ի իր խուցը, որի պայմաններն անհամատեղելի են հետվիրահատական շրջանի հետ։
«Քրեակատարողական բժշկության կենտրոն» ՊՈԱԿ-ի «Արմավիրի» ստորաբաժանման բուժկետում վերանորոգման աշխատանքներն են ու հնարավոր չէ այնտեղ բուժումներ իրականացնել։ Արսեն Գասպարյանը պահանջում էր իրեն տեղափոխել «Դատապարտյալների հիվանդանոց» ՔԿՀ, մինչեւ վերջնական ապաքինում։ Սակայն քրեակատարողական բժշկության կենտրոնի մասնագետները գտնում են, որ դեռ անհրաժեշտություն չկա Արսեն Գասպարյանին տեղափոխելու «Դատապարտյալների հիվանդանոց»։
Ըստ հարազատների՝ հոդվածի հրապարակումից հետո Արսենին տեղափոխել էին Վաղարշապատի բժշկական կենտրոն՝ նոր բուժհետազոտության նպատակով։
Կարդացեք նաև
«Հրապարակումից հետո նրա մոտ եկավ «Արմավիր» ՔԿՀ-ի պետ Գարիկ Ծատուրյանը՝ խորհուրդ տալով խնայել առողջությունը, դադարեցնել հացադուլն ու ջրադուլը։ Նաեւ ասաց, վերջնական ապաքինման նպատակով Արսենին տեղափոխելու են «Դատապարտյալների հիվանդանոց» ՔԿՀ»,- ասացին հարազատները։
Նրանց խոսքով, այս օրերին Գարիկ Ծատուրյանը պարբերաբար հանդիպում էր Արսենին, զրուցում նրա հետ։
ՀՀ ԱՆ քրեակատարողական ծառայության հանրային կապերի բաժնի պետ Նոնա Նավիկյանը քիչ առաջ մեզ հետ հեռախոսազրույցում պաշտոնապես տեղեկացրեց, որ որ Արսեն Գասպարյանը հացադուլն ու ջրադուլը դադարեցնելու մասին դիմում է ներկայացրել ու նրան արդեն տեղափոխել են «Դատապարտյալների հիվանդանոց» քրեակատարողական հիմնարկ։
Արմեն ԴԱՎԹՅԱՆ
