75-ամյա գյումրեցի Կիմա տատիկի նկատմամբ Հակակոռուպցիոն դատարանի որոշմամբ այսօր կիրառվեց վարչական վերահսկողություն:
Դատարանն այսօր բավարարեց Հակակոռուպցիոն կոմիտեի միջնորդած խափանման միջոց վարչական վերահսկողություն կիրառելու վերաբերյալ միջնորդությունը:
«Մինչեւ վերջին րոպեն մեղադրյալը մնաց անազատության մեջ: Շարունակում եմ պնդել, որ վարչական վերահսկողության միջնորդության դեպքում դա ուղղակի անթույլատրելի է: Պատրաստվում եմ որոշումը ստանալուն պես բողոքարկման մասին մտածել, որովհետեւ շատ լուրջ ձեւով Կիմա տատիկի համար սահմանափակումներ են նախատեսված: Հատկապես այդ էլեկտրոնային սարքը, որ ես միջնորդեցի գոնե այդ սարքը չկիրառել, բայց դատարանը որոշեց ամեն դեպքում կիրառել: Ես գիտեմ՝ ինչ դժվար է նույնիսկ երիտասարդ, բարձրագույն կրթությամբ մարդկանց համար, իսկ միայնակ ապրող 75 ամյա թոշակառու, նույնիսկ հեռախոս չունեցող անձի համար անընդհատ խնդիրներ է առաջացնելու»,- Aravot.am-ին ասաց Կիմա տատիկի պաշտպան Ռուբեն Մելիքյանը:
Նրա խոսքով՝ դատարանը մարդու իրավունքների երաշխավորի իր դերը չկատարեց. «Շատ բացասաբար եմ վերաբերում դատարանի որոշմանը: Այսինքն՝ կարելի է ասել, որ այս խնդիրը լուծված էր քննիչի միջնորդությամբ, որը վարչական վերահսկողության միջնորդություն էր բերել, ոչ թե տնային կալանքի»:
Կարդացեք նաև
Ըստ պաշտպանի՝ մեղադրանքի փաստական հիմքերի մասին իրենց արգելել են խոսել, բայց ըստ էության ընտրակաշառք տալու մասին է խոսքը գնում. «Ընտրակաշառք արտահայտությունը օրենքում ու առօրյայում տարբեր իմաստներ ունեն: Մարդիկ, որ լսում են ընտրակաշառք, հասկանում են գումար բաժանելը: Իսկ օրենքում ընտրակաշառքը շատ ավելի լայն հասկացություն է, հիմա սրա անունը ընտրակաշառք վերցնել, ստանալն է, բայց խոսքը գումարին չի վերաբերում, վերաբերում է ինչ-որ գումարային բնույթի ծառայություն ընդունելու խոստմանը…»:
Պարոն Մելիքյանի խոսքով, իր պաշտպանյալը հերքում է իրեն մեղսագրվող արարքը, ասում է՝ նման բան չի եղել:
Նրա խոսքով, այս դեպքով բազմաթիվ ձերբակալություններ են եղել, տասնյակ հարցաքննություններ են եղել, բայց վարույթ իրականացնող մարմինը որեւէ մեկից չի կարողացել ստանալ նման տեղեկություն, որովհետեւ նման բան չի եղել. «Այսքան մեծ ծավալի աշխատանքի արդյունքում ստացված մեղադրանքը ճիշտ եւ ճիշտ համընկնում է այն նույն խոսքերին, որոնք Սարիկ Մինասյանն ուղիղ եթերում ասում էր այն տատիկին փայտի հետ կապված: Եթե այստեղ կա մեղադրանք, ուրեմն պետք է այնտեղ էլ լինի մեղադրանք, որովհետեւ ասվել է այնտեղ բացահայտ, ուղիղ եթերում: Եթե այնտեղ չկա մեղադրանք, այստեղ էլ չպետք է լինի մեղադրանք: Վարույթ իրականացնող մարմինը քաղաքական պատվեր է կատարում ու քաղաքական պատվերի սահմաններում իրականացնում խտրական մոտեցում: Դատարանն էլ չի կատարում մարդու իրավունքների երաշխավորի իր գործառույթը: Իշխանությունների համար օրենքը գործեց միայն ընդդիմադիրների համար, այն էլ այն դեպքում, երբ իմ պաշտպանյալը չի ընդունում մեղադրանքը»:
Արփինե ՍԻՄՈՆՅԱՆ