«Ես վստահ եմ, որ Հայաստանը խաղաղության գործընթացն առաջ է տանում եւ անում է քայլեր, որոնք կառուցողական են եւ որոնք նպաստում են գործընթացի առաջխաղացմանը եւ դրա չլճացմանը։ Նման քայլերից ամենացցունը խաղաղության պայմանագրի տեքստի շուրջ համաձայնության գալն է եւ առաջարկությունը՝ բանակցություններ սկսել ստորագրման շուրջ։ Ուստի, ես կարծում եմ, որ պետք է շարունակենք այս տրամադրվածությամբ աշխատել»,- խորհրդարանում լրագրողների հետ ճեպազրույցում ասաց ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը։
Նրա խոսքով՝ սա միակողմանի գործընթաց չէ, բայց որոշ արդյունքներ, այնուամենայնիվ, գրանցվել են։ Ըստ Խանդանյանի՝ այն, որ տեքստը համաձայնեցվել է՝ կարեւոր արդյունք է։
Անդրադառնալով Ալիեւի հայտարարություններին՝ Խանդանյանն ասաց․ «Ես առաջարկում եմ բառախաղի մեջ չմտնել՝ նոր նախապայմաններ, հին նախապայմաններ։ Այնուամենայնիվ դրանք կան ու նախապայմաններ են։ Մեր դիրքորոշումն այդ հարցերով շատ հստակ է։ Խաղաղության պայմանագիրն ընդհանրապես լուծում է Սահմանադրության խնդիրը, եթե այդպիսի խնդիր նույնիսկ լիներ։ Իսկ մենք հավատում ենք, որ այդպիսի խնդիր չկա։ Իսկ ԵԱՀԿ Մինսկի խմբի մասով մենք ասել ենք, որ, այո, պատրաստ ենք դիմել՝ ԵԱՀԿ Մինսկի խումը լուծարելու համար, որովհետեւ պետք է ինստիտուցիոնալ խաղաղություն հաստատվի առնվազն»։
Խանդանյանն ասաց՝ այն, որ Հայաստանը պատրաստվում է նոր Սահմանադրություն ընդունել, այդ մասին բազմիցս հայտարարվել է, բայց դրա ժամկետների մասին նույնպես խոսվել է։ Նրա խոսքով՝ դա «խաղաղության գործընթացի» հետ կապ չունի։ «Սահմանադրական փոփոխությունների հարցը Հայաստանի ներքին հարցն է։ Բնականաբար, Սահմանադրությունը շատ տարբեր հարցերի է անդրադառնում, եւ դա պետք է լինի իրական Հայաստանի մասին»,- հավելեց նա։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
Լուսանկարը՝ ՔՊ ֆեյսբուքյան էջից
