«Արմավիր» քրեակատարողական հիմնարկի ցմահ դատապարտյալ Արսեն Գասպարյանը մի քանի օր է՝ հացադուլ ու ջրադուլ է հայտարարել։ Այս մասին հեռախոսազանգով տեղեկացրեց հենց ինքը՝ նշելով, որ ծայրահեղ այդ քայլին դիմել է, որպեսզի «Քրեակատարողական բժշկության կենտրոն» ՊՈԱԿ-ի աշխատակիցներն ուշադրություն դարձնեն նրա առողջական վիճակին։
«Որոշ ժամանակ առաջ վիրահատվել եմ քաղաքացիական հիվանդանոցում, պոչուկի շրջանում խնդիր ունի։ Դուրս գրվելուց հետո միանգամից տեղափոխեցին խուց, որի պայմանները հարմար չեն հետվիրահատական շրջանն անցկացնելու համար։ Բանտի բուժմասը վերանորոգվում է, ու չեն կարող ինձ տեղափոխել այնտեղ»,-ասաց Արսենը։
Նրա խոսքով՝ ՔԿՀ-ի պետ Գարիկ Ծատուրյանը առաջին մասնաշենքում (որտեղ պատիժ է կրում Արսենը-Ա․ Դ․) տեսնելով Արսենի վիճակը, հորդորել է բժիշկներին տանելու բուժզննման։ «Շնորհակալ եմ պարոն Ծատուրյանին, բայց քանի որ բուժմասերը իր ենթակայության տակ չեն, ավել բան չի կարող անել։ Ստուգման արդյունքում պարզվեց, աղիքների բորբոքում ունեմ ու անհապաղ բուժման կարիք ունեմ, բայց անտարբերության եմ մատնված»,-նշեց Արսենը։
Ցմահ դատապարտյալը խնդրում է իրեն գոնե տեղափոխել «Դատապարտյալների հիվանդանոց» քրեակատարողական հիմնարկ։ Պոչուկի վիրահատությունից հետո դեռ թույլ է զգում իրեն ու հիմա էլ աղիքների խնդրի պատճառով դժվարանում է քայլել․ ունի անվասայլակի կարիք, բայց դա էլ բժիշկները չեն տվել։
Կարդացեք նաև
«Դիմում եմ ուղարկել նաեւ վարչապետ Նիկոլ Փաշինյանին՝ խնդրելով ուշադրություն դարձնել «Քրեակատարողական բժշկության կենտրոն»-ի աշխատանքին, նկարագրել եմ վիճակս»,-նշեց մեր զրուցակիցը։
ՀՀ արդարադատության նախարարության քրեակատարողական ծառայության հանրային կապերի բաժնի պետ Նոնա Նավիկյանը մեր հեռախոսազրույցում հաստատեց, որ մարտի 28-ից Արսեն Գասպարյանը հացադուլ ու ջրադուլ է հայտարարել՝ առողջական խնդիրների պատճառով։
ՀՀ առողջապահության նախարարության «Քրեակատարողական բժշկության կենտրոն» ՊՈԱԿ-ի տնօրեն Կամո Մանուկյանը Aravot.am-ի հետ հեռախոսազրույցում տեղեկացրեց, որ Արսեն Գասպարյանի առողջական վիճակը բժիշկների հսկողության ներքո է։ «Նախ ասեմ՝ «Դատապարտյալների հիվանդանոց» ՔԿՀ տեղափոխվում են բժշկի ցուցումների ու եզրակացության հիման վրա։ Այս պահին Արսեն Գասպարյանին նման ցուցում չկա»,-նշեց Կամո Մանուկյանը՝ ավելացնելով, որ պատիժ կրող ոչ մի անձ երկար չի մնում «Դատապարտյալների հիվանդանոցում» ՔԿՀ-ում։
«Բուժման կուրսը ստանալուց հետո նրանք դուրս են գրվում։ Արսեն Գասպարյանին երկու օր առաջ ենք նորից տարել քաղաքացիական հիվանդանոց՝ բուժհետազոտության։ Վիճակն այս պահին կայուն է, նորից եմ ասում՝ անհրաժեշտության դեպքում նրան կտեղափոխենք «Դատապարտյալների հիվանդանոց»,-ասաց քրեակատարողական բժշկության կենտրոնի տնօրենը։
Ինչ վերաբերում է անվասայլակ տրամադրելուն, ապա պարոն Մանուկյանի հավաստմամբ՝ «Կարիք ունեցողներին միշտ տրամադրվում է անվասայլակ՝ ժամանակավոր օգտագործելու համար»։
Արսեն Գասպարյանը մեր զրույցում հաստատեց, որ իրեն տեղափոխել են քաղաքային հիվանդանոց՝ մի քանի լրացուցիչ հետազոտության համար։ «Դեռ պատասխանները չկան, կլինեն երկու օրից, բայց ինքնազգացողությունս վատ է։ Դիմում եմ նաեւ Մարդու իրավունքների պաշտպան Անահիտ Մանասյանին՝ խնդրելով ուշադրության իմ նկատմամբ կիրառվող ոչ ճիշտ մոտեցմանը»,-ասաց Արսեն Գասպարյանը։
Դատապարտյալի առողջական վիճակի մասին տվյալները հրապարակվում են նրա համաձայնությամբ։
Արմեն ԴԱՎԹՅԱՆ
Լուսանկարում «Քրեակատարողական բժշկության կենտրոն» ՊՈԱԿ-ի «Արմավիր» ստորաբաժանման բուժմասն է
