Մինչեւ այս տարվա ապրիլի 1-ը Ռուսաստանում բնակվելու իրավունք ու կացության կարգավիճակ ունեցող, ինչպես նաեւ երկքաղաքացի հանդիսացող օտարերկրացիներն իրավունք ունեին պարզեցված կարգով փոխել իրենց պետության վարորդական իրավունքի վկայականները ՌԴ վարորդական իրավունքի վկայականով՝ առանց քննություն հանձնելու։ Ապրիլի 1-ից այլեւս այդ կարգը չի գործելու, եւ անկախ նրանից՝ ունե՞ն կացության կարգավիճակ, ունե՞ն բնակության իրավունք, հանդիսանո՞ւմ են երկքաղաքացի, թե ոչ, որպեսզի ձեռք բերեն ՌԴ վարորդական իրավունք՝ պետք է քննություն հանձնեն։ Եվ այլեւս որեւէ օտարերկրացի չի կարող վարորդ աշխատել՝ չունենալով Ռուսաստանի Դաշնության վարորդական իրավունք, դա խախտում է համարվելու։ Այս մասին այսօր հրավիրած ասուլիսում ասաց «Հայկական Կարիտաս» կազմակերպության միգրացիոն ծրագրի փորձագետ Տաթեւիկ Բեժանյանը։
Նրա խոսքով՝ եթե ոստիկաններն անձին այս խախտման համար երկու անգամ տուգանեն, սա հիմք է լինելու, որպեսզի անձը մուտքի արգելք ստանա։
Բեժանյանն ասաց, որ Հայաստանի վարորդական իրավունք ունեցող վարորդները վաղուց իրավունք չունեին ՌԴ-ում վարորդ աշխատել, կարող էին միայն իրենց անձնական մեքենան վարել։ Հիմա էլ կարող են իրենց անձնական մեքենայով գնալ ՌԴ ու վերադառնալ։ Այս փոփոխությունը վերաբերում է նրանց, ովքեր Ռուսաստանում պետք է վարորդ աշխատեն՝ ուղեւորափոխադրում ու բեռնափոխադրում իրականացնեն։ «Փետրվարի 5-ից խստացումներն արդեն մեծ ծավալով ուժի մեջ են մտել։ Հիմա ավելի դժվար է լինելու, որովհետեւ օրենքը շատ հստակ ասում է՝ եթե անձը չունի ՌԴ կողմից տրամադրված վարորդական իրավունք, նա իրավունք չունի որպես վարորդ աշխատել։ Եթե այսպիսի խախտման համար բռնեն, դա արտաքսման հիմք է»,- ասաց նա։
Բեժանյանը հավելեց, որ Ռուսաստանում միգրացիոն քաղաքականության խստացման պայմաններում Հայաստանի միգրացիոն հոսքերը նվազման միտում ունեն։ «Վերջին երկու-երեք տարիների կտրվածքով 20-30 տոկոսով նվազում արդեն դիտարկվում է։ Բայց ավելի շատ դա կախված էր ռուբլու կուրսի հետ, հիմա դրան ավելացել են միգրացիոն խստացումները, հատկապես, երբ փետրվարի 5-ին ուժի մեջ մտավ արտաքսման ռեժիմը, ներդրվեց վերահսկվող անձանց ռեեստրը, որտեղ հայտնվում են բոլոր այն օտարերկրացիները, ովքեր ունեին որեւէ խախտում եւ շարունակում են հիմա հայտնվել, որովհետեւ այդ բազաները թարմացվում են։ Եվ ցավով պետք է նշեմ, որ այդ բազաներում սկսեցին հայտնվել մարդիկ, ովքեր որեւէ խախտում չունեին կամ որեւէ փաստաթղթի խնդիր չունեին։ Առնվազն մենք մի 500 նման դիմում ստացել ենք, որ անձինք հայտնվել են վերահսկվող անձանց ռեեստրում, եւ խորհրդատվության համար մեզ էին դիմում։ Այս անձանց համար ՌԴ նախագահն ընդունեց հրամանագիր, համաձայն որի՝ մինչեւ ապրիլի 30-ը թույլատրվեց վերահսկվող անձանց ռեեստրում գտնվողներին օրինականացնել իրենց գտնվելը ՌԴ-ում։
Կարդացեք նաև
Բայց սա էլ մեկ այլ խնդրի հանգեցրեց, որ ծավալն այնքան մեծ է, որ բազաները չեն հասցնում թարմացնել։ Եվ նույնիսկ, եթե նամակ է գալիս, որ անձը այլեւս հանված է ռեեստրից, 3-4 օր շարունակ անձը շարունակում է մնալ այդ ռեեստրում։ Իսկ ինչպե՞ս է երեւում, որ ռեեստրում է՝ անմիջապես սառեցվում են բանկային հաշիվները, եւ մարդը որեւէ գործարք չի կարողանում անել, ամսական թույլատրվում է մինչեւ 30 հազար ռուբլի կանխիկացնել։ Այդ անձինք ոչ մի գործարք չեն կարող անել, նույնիսկ եթե ունեն ռուսական վարորդական իրավունք, մեքենա չեն կարող վարել, առանց ոստիկանի թույլտվության բնակության վայրը չեն կարող փոխել։ Նախագահի հրամանով այս անձանց տրված է հնարավորություն՝ կամ օրինականացնել իրենց գտնվելը, կամ լքել ՌԴ տարածքը»,- ասաց Բեժանյանը։
Նրա խոսքով՝ շատերը կարծում են, որ իրենց փաստաթղթերն օրինական են, բայց հայտնվել են ռեեստրում։ Այնինչ, պարզվում է, որ նրանք, օրինակ, երկու տարի չեն անցել բուժզննում, ինչը պարտադիր է այդ ռեեստրում չհայտնվելու համար։
Նա անդրադարձավ նաեւ հարցին, թե ինչպե՞ս պետք է այդ անձինք օրինականացնեն իրենց՝ ՌԴ տարածքում գտնվելը։ Նախ` անպայման պետք է գնալ ու անցնել հերթական բուժզննումը։ Այնուհետեւ, փաստաթղթերը ստանալուց հետո, պետք է անձնագիրը հաշվառման թերթի ու կանաչ քարտի հետ միասին տանել տարածքային միգրացիոն ծառայություն, դիմում գրել, որ իրենց հանեն ռեեստրից։ Եթե հերթերը շատ են, քաղաքացիները կարող են նաեւ առցանց գրել դիմումը կամ զանգահարել 09656-57-67 «թեժ գծին», եւ մասնագետները նրանց կօգնեն։ «Սա կարեւոր է, եւ կարեւոր է հասցնել մինչեւ ապրիլի 30-ը։ Եվ հրամանագրում, եւ օրենքում նշված է, որ եթե մինչեւ ապրիլի 30-ն անձինք չհասցրեցին օրինականացնել իրենց գտնվելը ՌԴ-ում, նրանք ենթակա են արտաքսման։ Շատ մեծ է այն մարդկանց թիվը, ովքեր հայտնվել են ռեեստրում՝ 30-40 հազար ՀՀ քաղաքացի այդ ռեեստրում հայտնվել է»,- ասաց Տաթեւիկ Բեժանյանը։
Ռոզա ՀՈՎՀԱՆՆԻՍՅԱՆ
