«Սրբազան պայքարի» երիտասարդների՝ «Չեմ վստահում Նիկոլ Փաշինյանի իշխանությանը» նախաձեռնության մասնակիցներին երեկ Սուրբ Աննա եկեղեցու մոտ այցելեց Բագրատ սրբազանը:
Այդ պահին Aravot.am-ը այնտեղ էր եւ օգտվելով առիթից՝ զրուցեց Սրբազան հոր հետ:
«Նախ, ուզում եմ լայն իմաստով շնորհավորել Գյումրիի եւ Փարաքարի համարձակ ժողովրդին, որ չվախեցան: Հատկապես Գյումրիի պարագայում չվախեցան գնալու, քվեարկելու՝ հակառակ այն բոլոր ռեպրեսիաների, ինչին ականատես եղանք, կամ լսել ենք, ինչ մեզ փոխանցել են: Ուզում եմ Փարաքար համայնքին ամբողջ գնահատականով շնորհավորել, որովհետեւ շռնդալից հաղթանակ էր դա: Առաջին անգամ ի՞նչ հանցագործություն արեցին Փարաքարում՝ փորձելով իրենց սովորական ձեռագրով, իրենց, այսպես ասած, իշխանությունը հաստատել: Բայց ժողովուրդը եկավ ու վերահաստատեց, որ չէ:
Կարդացեք նաև
Դա փոփոխությունների շատ կարեւոր ցուցիչ է: Ես կարծում եմ, որ այս փոփոխություններին նպաստել է նաեւ անցնող ամբողջ ժամանակահատվածում «Սրբազան պայքարի» բերած շունչը: Վստահ եմ, որ նաեւ այդպես է: Մաղթում եմ, որ այդ շունչը՝ Փարաքարի, Գյումրիի շունչը, շարունակաբար մոտակա ժամանակներում ցուցիչ լինի նաեւ մեր մյուս համայնքների եւ ընդհանրապես մեր ժողովրդի համար, որ էս մարդկանց հեռացնելը անհնար չէ՝ անհրաժեշտ է:
Փարաքարում շատ տպավորիչ էր, թե ինչպես են մարդիկ տոնում:
Ես հավատում եմ, որ ոչ միայն պարոն Վալոդյայի շուրջը հավաքված մարդիկ էին: Մարդիկ իրապես ուրախանում էին, տոնում էին հաղթանակը: Շատ հուզիչ էր դա:
Ես ուզում եմ նաեւ «Ապրելու երկիր» կուսակցությանը շնորհավորել, որին սրանք նախորդ անգամ ուղղակի փորձեցին ճնշումով, իրենց բնորոշ մեթոդներով լռեցնել կամ հեռացնել, բայց չստացվեց: Ու այդպես համառորեն շարունակեցին ու արդարությունը հաղթեց:
Ուզում եմ բոլոր թեկնածուներին շնորհավորել: Գիտեմ, որ ապրիլի 17-ին է լինելու քաղաքապետի ընտրությունը: Մաղթում եմ, որ իմաստնությունը գործի, ընդհանրական շահը գործի, անձնական այս կամ այն հաշիվը չգործի՝ անկախ նրանից, թե տարիների ընթացքում ով՝ ինչ խնդիր է ունեցել: Բոլորս էլ կյանքում հազար ու մի խնդիրներ ենք ունեցել: Բայց դրանք երբեք առաջնային չեն եղել մեզ համար:
Արդարությունը միշտ հաղթում է, արդարությունը հեռու չի փախչում, հաղթանակում է: Ու դրա մասին ամենալավը գիտի չարիքը: Գիտեք չէ՞. Սուրբ Գիրքը ամենաընտիրն իմացողը սատանան է»,-ասաց «Սրբազան պայքարի առաջնորդը:
Աշոտ ՀԱԿՈԲՅԱՆ
Լուսանկարը՝ Մեսրոպ Առաքելյանի ֆեյսբուքյան էջից
