«Սրբազան պայքարի» երիտասարդները շարունակում են «Չեմ Վստահում Նիկոլ Փաշինյանի իշխանությանը» նախաձեռնությունը:
Երեկ նրանք անհնազանդության այս յուրատեսակ գործողությունը միաժամանակ իրականացնում էին մայրաքաղաքի Սուրբ Աննա եկեղեցու մոտ, եւ մետրոյի «Հանրապետության հրապարակ» եւ «Երիտասարդական» կայարանների հարեւանությամբ:
Կարդացեք նաև
Aravot.am-ը երիտասարդներից հետաքրքրվեց, թե ինչպես են ընթանում գործերը:
-Մարդկանց ակտիվությունը ձեզ գոհացնո՞ւմ է:
-Սա երիտասարդների ինքնաբուխ նախաձեռնություն է: Նույնիսկ Սրբազան Հայրը սկզբից տեղյակ չէր, որ «Սրբազան պայքարի» երիտասարդական թեւը այսպիսի գործողություններ է կազմակերպել: Արդեն 14 օր է, այսօրն էլ հաշված՝ 15-րդ օրն է, ինչ սկսել ենք այս նախաձեռնությունը: Մենք մեր ակցիաներն իրականացնում ենք օրը մոտ երեք ժամ: Ընդհանուր առմամբ ստացվում է մոտ 42 ժամ: Ժողովուրդը շատ ակտիվ է եւ այդ 42 ժամում արդեն ունենք 10 հազարից ավելի քվեաթերթիկ:
-Տեսնում եմ, որ շատերը զրույցի են բռնվում ձեզ հետ: Մարդիկ ի՞նչ են ասում:
-Դժգոհ են ու չեն վստահում իշխանություններին: Երեկ ենք քվեները հաշվարկել եւ որոշ թերթիկների վրա հանդիպել ենք բավականին հուզիչ գրառումների: Դրանք գերազանցապես «մաղթանքներ» են գործող իշխանությանը եւ նրա ղեկավարին: Մասնավորապես, զոհված մեր հերոսների ծնողների ու հարազատների գրառումներն են հուզիչ, որոնց զավակները զոհվել, մարտիրոսվել են հանուն Հայրենիքի: Օրինակ, մեկը գրել էր. «Իմ ընտանիքը կիսատ է, ու դրա պատճառը դու ես», մյուսը՝ «Գնա, դավաճան» ու նույնաբովանդակ բազմաթիվ այլ գրառումներ:
Արցախցի մեր քույրերն ու եղբայրներն էլ են ակտիվ: Նրանց ուղերձները գերազանցապես հայրենի օջախ վերադառնալու եւ այս իշխանությանը չվստահելու մասին են:
Աշոտ ՀԱԿՈԲՅԱՆ
