«Ազատ Եվրոպա/Ազատություն» ռադիոկայանն այսօր սկսել է հարկադիր արձակուրդի ուղարկել Պրահայի կենտրոնակայանի աշխատակիցներին, քանի որ ԱՄՆ Գլոբալ մեդիայի գործակալությունը (USAGM) չի ուղարկել Կոնգրեսի կողմից հատկացված ապրիլ ամսվա ֆինանսավորումը:
Չնայած USAGM-ը մարտի 26-ին չեղարկել է ռադիոկայանի դրամաշնորհային համաձայնագրի դադարեցման մասին իր նամակը, այդ ժամանակից ի վեր «Ազատությունը» չի ստացել Կոնգրեսի կողմից հատկացված միջոցներից որևէ մեկը, և ԱՄՆ Գլոբալ մեդիայի գործակալությունը չի հաստատել «Ազատության» ապրիլ ամսվա ֆինանսական ծրագիրը, չնայած այն ստացել է գրեթե երկու շաբաթ առաջ և չնայած այս ֆիսկալ տարվա համար նախորդ ֆինանսական ծրագրերի արագորեն հաստատմանը:
Երեկ «Ազատ Եվրոպա/Ազատությունը» նոր միջնորդություն է ներկայացրել Վաշինգտոնում ԱՄՆ շրջանային դատարան՝ խնդրելով դատարանին կիրառել ժամանակավոր կասեցում, որպեսզի ռադիոկայանը կարողանա առանց խոչընդոտների ծախսել հատկացված միջոցներն ապրիլին, ինչպես նաև նախնական կարգադրություն՝ ապահովելու համար, որ ԱՄՆ Գլոբալ մեդիայի գործակալությունն «Ազատությանն» ուղարկի Կոնգրեսի կողմից հատկացված միջոցներն ընթացիկ ֆինանսական տարվա մնացած մասի համար:
«Ազատ Եվրոպա/Ազատություն» ռադիոկայանի նախագահ և գործադիր տնօրեն Սթիվեն Կապուսն ասել է. «Մեր աշխատակիցներն ու նրանց ընտանիքներն են հիմա վճարում դրա գինը, մինչ «Ազատություն» ռադիոկայանը շարունակում է սպասել, թե երբ USAGM-ը մեզ կտրամադրի Կոնգրեսի հատկացրած միջոցները: Ավելի քան յոթ տասնամյակ «Ազատություն» ռադիոկայանն ԱՄՆ ազգային անվտանգության կենսական միջոց է եղել՝ պայքարելով գրաքննության դեմ՝ նորությունները հասցնելով միլիոնավոր մարդկանց աշխարհի ամենաճնշող հասարակություններում:
Կարդացեք նաև
«Ազատություն/Ազատ Եվրոպա» ռադիոկայանը կշարունակի մնալ դատարանում այնքան ժամանակ, քանի դեռ մենք բավարար երաշխիքներ չունենանք, որ USAGM-ը կհետևի օրենքին և կուղարկի մեզ այն միջոցները, որոնք Կոնգրեսը հատկացրել է մեզ»:
X-ում Սթիվեն Կապուսը լուսանկար է հրապարակել և նշել. «Ազատության» հպարտ պատմության ամենադժվար օրերից մեկը»:
One of most difficult days in the proud history of @RFERL. We’re forced to furlough a large percentage of staff. USAGM, despite assurances, continues to withhold our Congressionally appropriated operating funds. We’re alive, but serving audiences with reduced staffing & funds pic.twitter.com/kuR0WRqWop
— Steve Capus (@SteveCapus) April 1, 2025
«Մենք ստիպված ենք հարկադիր արձակուրդի ուղարկել անձնակազմի մեծ մասին։ ԱՄՆ Գլոբալ մեդիայի գործակալությունը, չնայած հավաստիացումներին, շարունակում է չտրամադրել Կոնգրեսի կողմից հատկացված գործառնական միջոցները: Մենք կենդանի ենք, բայց լսարանին սպասարկում ենք կրճատված անձնակազմով և միջոցներով»:
