Երկու օր է՝ Գյումրիում քննարկման միակ թեման այն է, թե ով կդառնա քաղաքապետ․ կմիավորվե՞ն արդյոք բոլոր ընդդիմադիր ուժերը՝ ամենաշատ ձայներ հավաքած Վարդան Ղուկասյանին առաջադրելով քաղաքապետ, թե՞ սցենար կփոխվի կամ նոր ընտրություններ կլինեն։
Այս պահին հարցերի պատասխանը կախված է միմիայն ԱԺ պատգամավոր, «Մեր քաղաքը» դաշինքի քաղաքապետի թեկնածու Մարտուն Գրիգորյանից․ ՏԻՄ ընտրությունների անցողիկ շեմը հաղթահարած մյուս երկու ընդդիմադիր ուժերը՝ «Իմ հզոր համայնքն» ու «Մայր Հայաստան» դաշինքն արդեն իսկ հայտարարել են Վարդան Ղուկասյանի օգտին քվեարկելու մասին։
Պատգամավորը դեռ պաշտոնապես չի արձագանքել, սակայն նրա շրջապատից հավաստիացնում են, որ թեև չեն շտապում հապճեպ հայտարարություն անել, սակայն անշեղորեն պահելու են իրենց սկզբունքները․ Գյումրու իշխանությունը ՔՊ-ին չի անցնելու։
Մինչդեռ Մարտուն Գրիգորյանի լռությունը տարբեր մեկնաբանությունների առիթ է տվել, ընդհուպ լուրեր են տարածվում, թե ՔՊ-ն պատրաստ է Մարտուն Գրիգորյանի օգտին ձայն տալ, միայն թե Վարդան Ղուկասյանի չլինի քաղաքապետ, որին իրենք դաժանորեն քննադատում էին ընտրարշավի ժամանակ։
Կարդացեք նաև
Որ այս լուրերը իրականությանը չեն համապատասխանում, կարելի է ենթադրել հենց ՔՊ-ականների գրառումներից։ Նրանցից ոմանք իրենց գրառումներով պատգամավորին անուղղակի ձևով հորդորում են թույլ չտալ Վարդան Ղուկասյանի վերադարձը։
Երբեմն նաև Մարտուն Գրիգորյանին հիշեցնում են նրա թիմակցի՝ Շեկոյի սպանությունն ու կրակոցների արդյունքում Գրիգորյանների մտերիմի՝ Քավոր Հարութի հաշմանդամություն ձեռք բերելը՝ հարցնելով՝ արդյոք կմոռանա՞ թափված արյան մասին։
Հիշեցնենք, որ Վարդան Ղուկասյանի եղբորորդին՝ Վահե Ղուկասյանը, դեռ քրեակատարողական հիմնարկում է, նա դատապարտվել էր 17 տարվա ազատազրկման պատգամավորի ընտանիքի մտերիմ Շեկո մականունով հայտնի Արտյոմ Կարապետյանի սպանության մեղադրանքով։
2013 թվականի ապրիլին զինված միջադեպ էր տեղի ունեցել Մարտուն Գրիգորյանի ընտանիքի մտերիմ՝ Քավոր Հարութի տան դիմաց, կրակոցների ժամանակ քավոր Հարութի անչափահաս դուստրը ևս ներկա էր գտնվել։ Վարդան Ղուկասյանի եղբորորդին կրակոցներ էր արձակել Մարտուն Գրիգորյանի եղբոր երեխաների կնքահոր ուղղությամբ։ Կրակոցներից մահացել էր Գրիգորյանի եղբոր՝ Շեկո անունով թիկնապահը, իսկ քավորը՝ Հարություն Խաչատրյանը, վնասվածքներ էր ստացել։ Ըստ հրապարակումների՝ մինչ այս կրակոցները Հարություն Խաչատրյանի տղան երկաթյա ձողով հարվածել էր Վարդան Ղուկասյանի եղբոր տղայի գլխին։
Ինչևէ, այս երկու գերդաստանների միջև միշտ եղել է որոշակի լարվածություն, դրանք մի անգամ սրվել էին 2008 թվականի Գյումրու քաղաքապետի ընտրությունների ժամանակ, երբ ԱԺ պատգամավոր Մարտուն Գրիգորյանն ու Գյումրու քաղաքապետ Վարդան Ղուկասյանը թեժ ընտրապայքարի մեջ էին մտել, սակայն 2013 թվականի միջադեպն առավել սրել էր նրանց հարաբերությունները։
Նշենք, սակայն, որ Վարդան Ղուկասյանը պարբերաբար հայտարարում է, որ իրենց միջև ոխերիմ թշնամություն չկա․ նորմալ հարաբերություններ ունի պատգամավորի հոր, հորեղբոր հետ, հնարավոր է նստել, բանակցել։
Ըստ նրա, իրենց հարաբերությունները փորձել են փչացնել մայրաքաղաքից՝ լարվածություն ստեղծելով Գյումրիում։
Նա երեկ իր հրավիրած մամուլի ասուլիսում լրագրողներից մեկի հարցին պատասխանելով՝ անդրադարձավ նաև Շեկոյի սպանությանը՝ նշելով․ «Համապատասխան դատավարությունը եղել է, մարդիկ հիմա դատապարտված են, ամեն ինչ ցուցադրվել է հազար անգամ հեռուստատեսությամբ, դրան հիմա չեմ ուզում անդրադառնալ, նորից մեկնաբանել 12 տարի հետո»։
Թե ինչ սցենար կզարգանա Գյումրիում, Մարտուն Գրիգորյանն առայժմ պահում է ինտրիգը։
Փոխարենը խոսել է նրա գործընկերը «Պատիվ ունեմ» խմբակցության ղեկավար Հայկ Մամիջանյանը՝ գրելով․ «Վաղը սպասելու եմ Մարտուն Գրիգորյանին թիրախավորողների զղջացող գրառումներին: Այս անիմաստ աղմուկից մի օգուտ եղավ՝ մի խումբ փողով գործիՔներ և գործիՉներ այսօրվա իրենց հացն էլ վաստակեցին ՀՀԿ-ի մասին ստեր ու դավադրապաշտական զառանցանքներ տարածելով»:
Նունե ԱՐԵՎՇԱՏՅԱՆ
