Հայաստանի ֆուտբոլի ֆեդերացիայի նախկին նախագահ, ԱԺ նախկին պատգամավոր Ռուբեն Հայրապետյանին եւ նրա ընտանիքի անդամներին վերաբերվող ենթադրյալ ապօրինի գույքի գործով նախորդ նիստում դատախազ Ռուզաննա Խուդավերդյանը պետք է հայցի փոփոխության մասով դիրքորոշում հայտներ, սակայն նա հայտարարեց, որ հարցը դատախազությունում դեռ քննարկման փուլում է, վերջնական որոշում չկա։
Այս ընթացքում Ռուբեն Հայրապետյանի պաշտպաններն էին տարբեր գրություններով դիմել դատախազություն՝ վերահաշվարկ կատարելու եւ հայցի պահանջն էապես նվազեցնելու համար։ Այդ հիմքով անգամ այս վարույթը կասեցնելու միջնորդություն էին ներկայացրել պաշտպանները, սակայն դատարանը որոշեց այդ հարցին անդրադառնալ այլ դատավարական փուլում։
Այս գործով մի քանի դատական նիստեր նախորդ տարվա ընթացքում հետաձգվել էին այն պատճառաբանությամբ, որ դատախազությունում աշխատում են վերահաշվարկի ուղղությամբ եւ չէին բացառում հայցի առարկայի փոփոխությունը։
Կարդացեք նաև
«Մենք սպասում էինք այդ վերահաշվարկին եւ հայցի առարկայի փոփոխությանը, բայց նախորդ դատական նիստին պարզ դարձավ, որ որեւէ վերահաշվարկ դատախազությունում չունեն։ Չգիտենք՝ ի՞նչ պատճառով, որովհետեւ մենք պնդում ենք, որ մեր ներկայացրած տվյալներն առավել քան բավարար են վերահաշվարկը կատարելու համար»,- այսօր լրագրողների հետ զրույցում, պատասխանելով Aravot.am-ի հարցին, ասաց պաշտպան Վահագն Դալլաքյանը։
Հիշեցնենք, դատախազությանը ներկայացված առարկություններից մեկն էլ վերաբերվում է «Հայէկոնոմբանկից» դատարան ներկայացված կեղծ տեղեկանքին, որը, ըստ պաշտպանի, հիմնավորապես կարող է փոփոխել հայցի առարկան։
Ըստ դատարան ներկայացված քաղվածքի, որը վերաբերվում է հայցի հիմքի ենթադրյալ ապօրինի ծագում ունեցող մի մեծ հատվածին, Հայրապետյանների ընտանիքին պատկանող ընկերություններից մեկի բանկային հաշվով որեւէ շրջանառություն չի եղել տարիների ընթացքում, բայց պաշտպանական կողմն ունի հենց բանկի տրամադրած անդորրագրերը՝ բնօրինակով, որոնք ցույց են տալիս խոշոր չափի շրջանառություններ այդ բանկային հաշվով։
«Այդ առերեւույթ կեղծ քաղվածքի վրա հիմնվելով՝ դատախազությունն ապօրինի է որակել 2001-2004 թվականներին ստացված շուրջ չորս միլիարդ դրամի եկամուտ՝ շահութաբաժինների եւ բաժնեմասի օտարման արդյունքում ստացված եկամուտ։ Այդ չորս միլիարդ դրամից բխող հետագա եկամուտներն էլ, գույքի ձեռքբերումներն էլ դարձյալ գնահատվել են ապօրինի՝ հետագա տարիների ընթացքում»,- ասաց Վահագն Դալլաքյանը։
Այս ամենի վերաբերյալ պաշտպանական կողմը փաստեր է ներկայացրել, քրեական վարույթ է նախաձեռնվել, որը, որ ըստ պաշտպանի, դանդաղ է առաջ գնում։
Վահագն Դալլաքյանը պնդում է՝ այն առարկությունները, որոնք հաջորդիվ կներկայացվեն դատարանին, էապես կարող են փոխել դատախազության ներկայացրած հաշվարկը։
Իսկ ինչո՞ւ է հիմա դատավորը շտապում եւ չի ընդառաջում պաշտպանական կողմի խնդրանքին՝ երկար ժամանակ տրամադրել դատախազության ներկայացրած տեղեկանքն ուսումնասիրելու համար՝
Մանրամասները տեսանյութում
ՀՀ հակակոռուպցիոն դատարանում, Կարապետ Բալայանի նախագահությամբ այսօր պետք է շարունակվեր Ռուբեն Հայրապետյանին եւ նրա ընտանիքին վերաբերվող ենթադրյալ ապօրինի գույքի գործով դատավարությունը։ Պաշտպանական կողմը հայցվորին պետք է շարունակեր հարցեր տալ։ Նիստը, սակայն հետաձգվեց։
Դատախազությունը մարտի 8-15 ընկած ժամանակահատվածում պետք է պաշտպանական կողմին փոխանցեր Հայրապետյանների ընտանիքի ենթադրյալ ապօրինի գույքի վերաբերյալ թվային հաշվարկների մասին տեղեկանքը։ Փաստաթուղթը պաշտպանական կողմը ստացել է մարտի 20-ին միայն եւ քանի որ կարիք կա մասնագետների՝ ֆինանսիստների ներգրավմամբ այն ուսումնասիրելու, չեն հասցրել։
Դատավորը բավարարեց Ռուբեն Հայրապետյանի ընտանիքի շահերը ներկայացնող Վահագն Դալլաքյանի՝ նիստը հետաձգելու միջնորդությունը՝ մասնակի․ այսօրվա եւ ամսի 3-ին նշանակված նիստերը հետաձգվեցին։ Պաշտպանն ակնկալում էր, որպեսզի դատարանը հետաձգի առաջիկա շաբաթվա ընթացքում նշանակված եւս մեկ նիստ ՝ առավել շատ ժամանակ տրամադրելով պաշտպանական կողմին, որպեսզի ծանոթանան դատախազության փոխանցած տեղեկանքին։ Նախորդ նիստին պաշտպանը մեկ ամիս ժամանակ էր խնդրել՝ նյութերին ծանոթանալու համար, քանի որ դրանք ծավալուն են։ Դատավորը երկու շաբաթ էր տրամադրել։
Մանրամասները` տեսանյութում
Հիշեցնենք նաեւ, որ դատախազությունը նոր մեղադրանք էր առաջադրել Ռուբեն Հայրապետյանին, այդ թվում նաեւ ՀՖՖ-ից 150 միլիոն դրամի ենթադրյալ հափշտակության վերաբերյալ:
Նիստն ամբողջությամբ՝ այստեղ
Նելլի ԳՐԻԳՈՐՅԱՆ
