ԱԺ «Քաղաքացիական պայմանագիր» խմբակցության պատգամավոր Վիլեն Գաբրիելյանն այսօր ֆեյսբուքի իր էջում գրել է , որ Գյումրիում իր մասնակցությամբ միջադեպերը համարում է ոչ վայել Հայաստանի Հանրապետության Ազգային Ժողովի պատգամավորի վարքին, որովհետեւ նրա ձեւակերպմամբ, ԱԺ պատգամավորն իր առաքելությունում պարտավոր է չդրսեւորել անհարկի վարքագիծ:
Նա նաեւ հանդես է եկել հրապարակային ներողությամբ եւ պատգամավորի մանդատը վայր դնելու մասին հայտարարությամբ:
«Կարեւոր է իմանալ, թե Վիլեն Գաբրիելյանն ինքնուրո՞ւյն է որոշել, թե՞ իրեն ասել են, որ մանդատը վայր դնի: Եթե ինքնուրույն է որոշել, ուրեմն դա հարգանքի արժանի քայլ է: Առհասարակ այդ միջադեպը, որ տեղի ունեցավ այն շարքում, որը մենք դիտարկում ենք՝ Անդրանիկ Քոչարյանի հետ կապված եւ դրանից առաջ, կարծես թե ՔՊ-ականների համար նորմ էր դարձել այդ սանձարձակ վարքագիծը, բայց տվյալ պարագայում այդ քայլը շատ ուշագրավ է: Ամեն մարդ կարող է սխալվել, եւ լավ է, որ այդ անձնավորությունն իր սխալն ընդունել է ու, ամենայն հավանականությամբ, այնքան է ամաչել, որ մանդատ է վայր դնում »,- Aravot.am-ի հետ զրույցում ասաց Խոսքի ազատության պաշտպանության կոմիտեի նախագահ Աշոտ Մելիքյանը:
Կարդացեք նաև
Նրա ձեւակերպմամբ. «Սա փոխում է այն տպավորությունը, որ ստեղծվել էր այդ տեսանյութերը դիտելուց եւ նման վարքագծին գնահատական տալուց հետո: Ես կարծում եմ, որ սա պետք է լավ օրինակ լինի ոչ միայն ՔՊ-ի, այլեւ բոլոր քաղաքական գործիչների համար, թե անպարկեշտ պահվածքից հետո ինչպես պետք է վարվի նորմալ մարդը»:
Գոհար ՀԱԿՈԲՅԱՆ
