Քիչ առաջ խորհրդարանում ավարտվեց անհայտ կորած զինծառայողների ծնողների հանդիպումը, որը կազմակերպել էր ԱԺ պաշտպանության եւ անվտանգության հանձնաժողովը։
Սա հանձնաժողովի կազմակերպած երկրորդ հանդիպումն էր, որին մասնակցում էին նաեւ ԱԱԾ ղեկավարը, պաշտպանության փոխնախարարներ եւ այլ ուժային կառույցների ներկայացուցիչներ։ Առաջին հանդիպումը եղել էր մոտ 1,5 ամիս առաջ։
Յոթ ժամ տեւած հանդիպումից ծնողները հեռացան մեծամասամբ դժգոհ։ Շատերը չցանկացան պատասխանել լրագրողների հարցերին։ Ոմանք կցկտուր ասացին՝ ոչ մի հարցի պատասխան էլ չեն ստացել, կամ՝ մասամբ են ստացել իրենց հարցերի պատասխանները։
«Իհարկե՝ ոչ, ոչ, ոչ, ոչ մի հարցի պատասխան էլ չենք ստացել։ Ոչ մի բան էլ չէին ասում, ջուր էին ծեծում։ 1,5 ամսում ոչ մի բան էլ չեն արել։ Փաստացի բերեցինք, որ բոլոր ԴՆԹ-ները սխալ են, փնթի, փնթի աշխատանք»,- ArmLur.am-ի լրագրողի հարցին ի պատասխան ասաց «Անհետ կորածների ընտանիքների աջակցության կենտրոն» ՀԿ նախագահ Անահիտ Ադոյանը։
Կարդացեք նաև
ԱԺ պաշտպանության եւ անվտանգության հանձնաժողովի նախագահ Անդրանիկ Քոչարյանն էլ արձագանքելով ծնողների դժգոհությունների մասին հարցին, պատասխանեց․ «Տարբեր տեսակետներ էին, բոլոր հարցերը ստացել են հասցեական պատասխաններ, ինչքանով կբավարարի՝ այլ հարց։ Շատերն իհարկե, օր առաջ ասում են՝ ո՞ւր է մեր երեխան եւ ծնողներին պետք է հասկանալ։ 7 ժամ չէիք կարող ջուր ծեծել։ Եթե ջուր ծեծելու լիներ, այս հավաքը երկրորդ անգամ չէր լինի»։
Պատրաստեց՝ Նելլի ԳՐԻԳՈՐՅԱՆԸ
