«Հանդիպմանը ներկա հերոսի հարազատը հարց ուղղեց ՔԿ նախագահ Պողոսյանին՝ ի՞նչ եք մտածում, ի՞նչ պետք է արվի այն տղաների մարմինների հետ, որոնց ծնողները հրաժարվում են ընդունել, որ դա իրենց որդիների մարմիններն է։ Պողոսյանը հարցը, իմ կարծիքով ճիշտ ․․․ ինչ-որ այլ պատասխան տվեց, ես ընդհատեցի, ասացի՝ եթե կարելի է պարզաբանեմ, թե ինչի մասին է խոսքը․ առաջին հերթին նրա մասին է, թե ի՞նչ պետք է անենք մենք՝ պետությունը, եթե մի քանի անգամ ԴՆԹ թեստ անելուց հետո հաստատվում է, որ մարմինը պատկանում է այսինչ հերոսին։ Ի՞նչ անենք, եթե մարդիկ հոգեբանական կամ այլ տեսանկյունից չեն ուզում ընդունել իրականությունը։ Այդ ընթացքում մի քանի ծնողներ վրդովվեցին»,-սա ԱԺ պատգամավոր, 44-օրյա պատերազմում զոհված Աբգար Նազարյանի հոր՝ Գեղամ Նազարյանի պարզաբանումն է՝ այսօր խորհրդարանում, անհայտ կորած զինծառայողների ծնողների հետ տեղի ունեցած միջադեպի մասին։
«Թյուրընկալեց ես ինչ եմ ասում»,- ասաց Գեղամ Նազարյանը՝ պնդելով, որ ծնողի հարցը ինքը պարզապես վերաձեւակերպել է, որպեսզի ճիշտ պատասխան հնչի։
«Գործ չունես մեր զավակների հետ, մեր տղաների անունները չտաս»,- արդեն միջանցքում բղավում էին վրդովված ծնողները՝ դիմելով Գեղամ Նազարյանին։
Կարդացեք նաև
Որպեսզի իրավիճակը չլարվի, Գեղամ Նազարյանը դուրս է եկել քննարկումից։ Նրան հետեւել են նաեւ որոշ ծնողներ եւ խոսակցությունը՝ բարձր տոներով, արդեն ԱԺ միջանցքում է շարունակվել։
Լրագրողների եւ Գեղամ Նազարյանի զրույցին միջամտեց ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը՝ տեղեկացնելով, որ որեւէ խնդիր չկա, թյուրընկալում է եղել, հարցը հարթվել է քննարկումների սենյակում, եւ առհասարակ, թեման զգայուն է ու պետք չէ դրանից սկանդալ սարքել․ «Չկա լարվածություն։ Բա ի՞նչ եք ասում, այսպիսի զգայուն թեմաներ շատ կա՞ն այս երկրում։ Ինքն էլ է երեխա կորցրել, իրենք էլ են կորցրել, բայց մենք դա իրար մեջ կհարթենք, պետք չի սա դարձնել․․․Այստեղ մենք հավաքվել ենք ոչ թե խեղդել՝ խեղդվելու, այլ խնդիրները լուծելու համար։ Ամբողջ ուժային պետական մեքենան այստեղ է եւ մենք լուծումներ կգտնենք»։
Անդրանիկ Քոչարյանը խոստովանեց՝ այս հարցում թերացումներ եղել են, բայց նաեւ վստահեցրեց՝ այժմ այդ թերացումների ետեւից են գնում։ Նա նկատում է, որ ծավալներն են մեծ ու դա է թերացումների, որակական արդյունքների առումով կասկածի տեղիք տվել, քանի որ ծնողները ընդամենը հիմնավոր ապացույցներ են ուզում, որպեսզի իմանան, թե ո՞ւմ են հուղարկավորում։
«Մի ասեք, որ մեր երեխաները մահացած են»,- սա այն արտահայտությունն է, որը անհայտ կորածների ծնողները պետական պաշտոնյաներից պահանջում են չասել։ Նրանք պնդում են՝ իրենց զավակներին նախ ողջերի մեջ փնտրել։
Անդրանիկ Քոչարյանը համամիտ է, պետք է այդպես վարվել։ Իսկ այն դեպքերում, երբ մարմիններ են գտնվում, պետք է այնպես լինի, որ ծնողները վստահ լինեն, որ դա իրենց զավակի մարմինն է։ Այս քննարկումն, ըստ Անդրանիկ Քոչարյանի, բավական արդյունավետ է ընթանում․ ծնողները տալիս են իրենց հուզող բոլոր հարցերը, ստանում են պատասխաններ, առաջարկներ են ներկայացնում։
Անդրանիկ Քոչարյանը նաեւ տեղեկացրեց՝ միջազգային ատյաններում Ադրբեջանի դեմ հայցերը ետ կանչելու հարց այս ձեւաչափում չի քննարկվելու։ Քննարկվելու են այն բոլոր հարցերը, որոնք մինչ օրս լուծումներ չեն ստացել՝ նաեւ այն պատճառով, որ գերատեսչությունների ղեկավարներ են փոխվել։
Նելլի ԳՐԻԳՈՐՅԱՆ
