«Մենք բեռ չենք», «Արժանապատիվ կյանք», «Վերանայեք աջակցության ծրագրերը». այս եւ այլ պահանջներով Արցախից բռնի տեղահանված անձինք այսօր բողոքի ցույց էին անում ՀՀ աշխատանքի և սոցիալական հարցերի նախարարության առջեւ։ Նրանց ներկայացուցիչներին հանդիպման հրավիրեցին նախարարությունում։ Արցախցիները բարձրաձայնում են իրենց վերաբերյալ սոցիալական բնույթի ծրագրերի մասով մտահոգությունները եւ լուծումներ առաջարկում։
«Սոցապ նախարարն իր խոսքում նշում էր, որ 40+10» ծրագիրը կարճաժամկետ ծրագիր է, եւ այն ներդրվել է, որպեսզի հետագայում դրան փոխարինի բնակապահովման ծրագիրը։ Եվ «40+10»-ը ապրիլ ամսից կրճատվում է, այնուհետեւ 2026-ից դադարեցվում է, եւ, ըստ նախարարի, դա միտված է, որպեսզի խթանեն, որ արցախցիները գնան եւ աշխատեն։ Ես ուզում եմ մի քանի հարց ուղղել Սոցապ նախարարին՝ որքա՞ն է կազմում նվազագույն սպառողական զամբյուղը մեկ շնչի հաշվով՝ 77 000։ Որքա՞ն է կազմում միջին աշխատավարձը ՀՀ-ում՝ 150-200 հազար։ Որքա՞ն են կազմում բնակարանների վարձերը՝ 150-200 հազար դրամ։ Ուրեմն ինչպե՞ս պետք է ձեր վճարած 40+10 աջակցության ծրագրի շնորհիվ ընտանիքները կարողանան եւ բնակվարձը վճարել, եւ պահպանել իրենց նվազագույն կենսաապահովման պայմանները։ Եթե դուք իսկապես չեք հավատում, որ այդ 40+10 հազարներն ուղղվում են միմիայն բնակվարձերի վճարմանը, ապա ես ձեզ մի առաջարկ ունեմ՝ եկեք դուք պայմանագիր կնքեք տանտերերի հետ, եւ մեզ պետք չէ ձեր 40+10-ը, միանգամից վճարեք տան տերերին»,- ասաց արցախցի Մարիամ Աբրահամյանը։
Մանրամասները՝ տեսանյութում
Կարդացեք նաև
Արցախցիները ֆլեշ-մոբ իրականացրեցին՝ գրառումներ կատարելով Աշխատանքի եւ սոցիալական հարցերի նախարարության շենքի մոտ՝ փորձելով այդ կերպ պաշտոնյաների ուշադրությունը հրավիրել իրենց խնդիրների վրա։
«Արցախի հարցը փակված չէ», «ՀՀ-ն Արցախի անվտանգության երաշխավորն է, ոչ թե դիտորդը», «Պետական ծրագրերը կարիքահեն չեն» այս եւ այլ բովանդակությամբ գրառումներ արեցին նախարարության շենքի աստիճաններին։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
