«Քարոզարշավի նյութերը տարածելիս անհավասար պայմաններ են եղել, մասնավորապես քաղաքական ուժերից մեկը հնարավորություն չի ունեցել իր վահանակները տեղաբաշխել եւ ներկայացվածություն ունենալ Գյումրիում»,- ասուլիսում նշեց «Ականատես» դիտորդական առաքելության ներկայացուցիչներից Մարիամ Հովեյանը։ Հավելեց, որ արձանագրվել են անանուն քարոզչանյութեր, քարոզչանյութերի վնասման դեպքեր, անանուն քարոզչանյութերը եղել են «Մայր Հայաստանի» թեկնածուին եւ եվրոպամետ քաղաքականությունը թիրախավորող նյութեր ու բուկլետներ, տարբեր քաղաքական ուժերի կողմից հնչող ատելության խոսք, թշնամանք եւ վիրավորանք է հնչել: «Ավելի հաճախ Կոմունիստական կուսակցությանը. «Իմ հզոր համայնք» քաղաքական ուժերին է ուղղված եղել ատելության խոսքը»,-ասաց նա:
«Նախընտրական քարոզարշավից առաջ անհամաչափ լուսաբանում է տեղի ունեցել Քաղաքացիական պայմանագիր կուսակցության օգտին, եղել է քարոզչություն, իշխանության ներկայացուցիչները հարցազրույցներ են տվել, ելույթներ են ունեցել, ընդհուպ մինչեւ նրանց ստատուսներն են ընթերցվել Հանրայինի եթերում, ինչը վարչական ռեսուրսի չարաշահում է»,-հավելեց Մարիամ Հովեյանը:
Ինչ վերաբերվում է ֆինանսավորման թափանցիկությանը, հետեւյալը նշեց. «Բազմաթիվ շտաբային տարածքներ են ունեցել կուսակցությունները, մասնավորապես Քաղաքացիական պայմանագիր եւ Ապրելու երկիր կուսակցությունների պարագայում հայտարարագրում դրանց ծախսերը ներկայացված չեն եղել, նաեւ մեծ գովազդների վրա են գումարներ ծախսվել Քաղաքացիական պայմանագրի կողմից, որոնք ավելի քիչ են հայտարարագրվել:
Մեկ ուշագրավ դեպք էլ Մայր Հայաստան դաշինքի կողմից՝ թեկնածուները մուտքեր են արել հիմնադրամին, բայց իրենց գույքի եւ եկամուտների հայտարարագրերն ուսումնասիրելիս հասկանում ենք, որ չունեին այդքան եկամուտներ, չունեին զբաղվածություն, որ կարողանային յուրաքանչյուրը գոնե կես միլիոն դրամի չափով ներդրումներ կատարել»:
Կարդացեք նաև
«Ականատեսի» մյուս ներկայացուցիչ Լեւոն Չուկակլյանը՝ ի թիվս այլնի, անդրադարձավ քվեարկության օրն արձանագրված խախտումներին. «Շուրջ 20 ընտրատեղամասերում կահավորումը կատարվել է օրենքով սահմանված պահանջների խախտմամբ, շուրջ 6 ընտրատեղամասերում միեւնույն քաղաքական ուժից՝ Հայաստանի կոմունիստական կուսակցությունից, ներկա է եղել 2-ական վստահված անձ:
31/78 տեղամասում ժամը 13-ի սահմաններում Գյումրու ծերերի խնամքի կենտրոնի աշխատակիցը 7-ից ավել տարեց անձանց ուղեկցել է ընտրատեղամաս, այնուհետեւ առանց գրանցամատյանում որեւէ մեկի օգնող գրանցվելու՝ ուղղորդել է թե ում քվեարկել, մատնանշելով թիվ 8 քվեաթերթիկը: 31/69 տեղամասին հարող՝ 50 մետր շառավիղը չգերազանցող տարածքում եղել են կուտակումներ, որոնք վերացել են, երբ եկել են լրատվամիջոցների ներկայացուցիչները: Կուտակումների ժամանակ տեղի է ունեցել ընդհարում, սակայն ոստիկանությունը պատշաճ չի արձագանքել»:
Չուկակլյանի խոսքով, 31/46 տեղամասում ժամը 14:35-ի սահմաններում ընտրողը բացահայտել է իր քվեարկությունը, բղավել է կոնկրետ թեկնածուի անուն, վերցրել է միայն մեկ քվեաթերթիկ: 31/69 եւ 31/70 տեղամասերի տարածքում Քաղաքացիական պայմանագիր կուսակցության համակիրները փորձել են խոչընդոտել դիտորդի աշխատանքը, ընտրատեղամասերի մուտքերի մոտ բարձրաձայն քարոզչություն են իրականացրել, որ միեւնույն է ՔՊ-ն է հաղթելու, դիտորներն արձանագրել են, որ ոստիկանները չեն արձագանքել իրավիճակել: «Դիտորդների պահանջին՝ արձագանքել եւ կանխել իրավիճակը, իրավապահները պատասխանել են, որ բղավողները հիվանդ մարդիկ են»,-նշեց Լեւոն Չուկակլյանը:
«Ականատեսի» ներկայացուցիչները այլ խախտումների մասին էլ նշեցին՝ այդ թվում չօգտագործված քվեաթերթիկների դուրս բերում ընտրատեղամասից, քաղաքական ուժերի առաջին համարների բնակության եւ ազդեցության թաղամասերում կուտակումներ, լարվածություն եւ այլն:
Գոհար ՀԱԿՈԲՅԱՆ
