Ի՞նչ է օրվա ընթացքում ֆիքսել Aravot.am-ի տեսախցիկը Փարաքարում. ամփոփում

Ժամը 20:00-ին փակվել են Արմավիրի մարզի 9 բնակավայր ընդգրկող Փարաքար խոշորացված համայնքի բոլոր ընտրատեղամասերը։

Մեկնարկում է ձայների հաշվարկը։

Ի՞նչ է ֆիքսել Aravot.am-ը

 Ժամը 12:00-ի սահմաններում ահազանգ ստացվեց «Միասնություն» կուսակցությունների դաշինքից։ Հայտնել էին, որ Մերձավանի 14/07 ընտրատեղամասում ընտրողներից մի քանիսին չեն տրամադրել «Միասնության» քվեաթերթիկը։

Կարդացեք նաև

ԵՄ առաջնորդները գիտեն, որ այդ կառույցի դռները միշտ փակ են լինելու Հայաստանի համար, ուստի չեն ցանկանում օրինագիծը ողջունելով կեղծ հույսեր արթնացնել մեր ժողովրդի մոտ. Մարուքյան

• 15:23 02.04.2025

«Ուղիղ հեռարձակումը չի ապահովել քվեարկության ամբողջ գործընթացի տեսանելիությունը, ինչը ԸՕ-ով սահմանված պարտադիր պայման է». դիտորդներ

• 15:11 02.04.2025

Բագրատ սրբազան. «Մաղթում եմ, որ Փարաքարի, Գյումրիի շունչը, շարունակաբար մոտակա ժամանակներում ցուցիչ լինի նաեւ մեր մյուս համայնքների եւ ընդհանրապես մեր ժողովրդի համար»

• 11:00 02.04.2025

Ընտրատեղամասի նախագահ Պատվական Մարգարյանի խոսքով՝ արձանագրվել է մեկ այդպիսի դեպք։ Ընտրողը չի նկատել, որ բոլոր քվեաթերթիկներն իրականում ունի։

Նույն ընտրատեղամասում պարզեցինք, որ Մերձավանի վարչական ղեկավար Մհեր Ախտոյանը 14/07 ընտրատեղամասում ՔՊ վստահված անձ է։ Ախտոյանը անհարգալից բառապաշարով մերժեց պատասխանել լրագրողների հարցերին։

Փարաքարի 14/12 ընտրատեղամասում «Միասնություն» դաշինքի վստահված անձը, որը Aravot.am-ի հետ զրուցեց անանուն մնալու պայմանով, տեղեկացրեց, որ թեեւ ընտրատեղամասի ներսում ամեն ինչ նորմալ է, դրսում կուտակումներ են, ՔՊ-ն տարեցներին մեքենաներով բերում է ընտրության, ուղղորդում ներս է ուղարկում։

Նկատեցինք, որ 14/12 ընտրատեղամասի հարեւանությամբ գտնվող տնից դուրս եկավ ՀՀ աշխատանքի եւ սոցիալական հարցերի նախարարը։ Նարեկ Մկրտչյանը Փարաքարի բնակիչ է, ասաց՝ եկել է իմանալու Լյուդվիգ Գյուլնազարյանի տրամադրվածությունը՝ վստահություն հայտնելով, որ իր կուսակիցը հաղթանակ է տանելու։

Առավոտյան փոքր միջադեպ էր տեղի ունեցել նույն ընտրատեղամասում։ Առաջին անգամ քվեարկության եկած աղջիկը ուշագնաց էր եղել։

Հիշեցնենք. Գյումրի եւ Փարաքար համայնքներում այսօր ընտրություններ են։ 

Համատեքստ

Տարեվերջին Կառավարության ղեկավարը հայտարարեց Արմավիրի մարզի Փարաքար համայնքում արտահերթ ընտրության անցկացման մասին։ Փարաքարը ղեկավարող, այժմ համայնքապետի պաշտոնակատար եւ թեկնածու Լյուդվիգ Գյուլնազարյանը նոյեմբերին հրաժարական էր ներկայացրել։ Դա այն բանից հետո, երբ Գյուլնազարյանը հայտնվել էր Երեւանի ավտոլվացման կետում, որտեղ սպանություն էր տեղի ունեցել։ ՔՊ-ական թեկնածուի խոսքով՝ նա այդտեղ պատահաբար էր հայտնվել, չնայած ճանաչում է ավտոլվացման կետի սեփականատերերին։ Գյուլնազարյանն ինքը ոտքից վիրավորվել էր միջադեպի ժամանակ։ Գործիչը նոյեմբերի իր հրաժարականը բացատրեց նախաքննությանը չխոչընդոտելու նպատակով։

Արսեն ԱՅՎԱԶՅԱՆ