«Անկախ դիտորդի» շրջիկ դիտորդները, որոնք այսօր վաղ առավոտից հետեւում են Գյումրու ու Փարաքարի ընտրություններին, կեսօրի վերջին տվյալներով, 19 խախտում Գյումրիում, 14 խախտում Փարաքարում են արձանագրել: Այս մասին լրագրողներին ասաց «Իրազեկ քաղաքացիների միավորում» հ/կ համակարգող Դանիել Իոաննիսյանը:
Ըստ նրա՝ վիճաբանության՝ 4, բաց քվեարկության՝ 3, դիտորդի իրավունքների խախտման երկու դեպք են արձանագրել: Վերջինի մասով էլ արդեն ներկայացրել են հանցագործության մասին հաղորդում:
Իոաննիսյանի խոսքով՝ 6 դեպք արձանագրել են տեղամասում գտնվելու իրավունք չունեցող անձի շարունակական գտնվելու վերաբերյալ, ինչպես նաեւ վստահված անձի կողմից իրականացվող ընթացակարգային խախտումների 9 դեպք, որոնցից կեսը մեկ կուսակցության մասով: Նա ասաց, որ կուսակցության անունը կհրապարակի այսօր 20:00-ից հետո:
Կարդացեք նաև
Ընտրախախտումները թվարկելով՝ Իոաննիսյանն ասաց, որ քվեաթերթիկ չտալու դեպք էլ են արձանագրել, այսինքն՝ մասնակից կուսակցություններից մեկի քվեաթերթիկ պակաս է տրվել ընտրողներին: Այդ խախտումը եղել է Գյումրիի՝ 31/1 տեղամասում: Իոաննիսյանի խոսքով, այդ տեղամասում կասկած կա, որ այդ երեւույթը պարբերական բնույթ է կրել, քանի որ երբ իրենց դիտորդներն արձանագրել են այդ երեւույթը, այլ ընտրողներ էլ են հայտնվել՝ պատմելով, որ իրենք էլ են պակաս քվեաթերթիկ ստացել. կոնկրետ մեկ կուսակցության քվեաթերթիկի մասին է խոսքը:
Նա նաեւ ասաց, որ 31/70 տեղամասում քվեարկության կտրոնի հափշտակության դեպք է արձանագրվել, ոստիկաններից միայն մեկն է փորձել հետապնդել քվեաթերթիկ գողացած ընտրողին:
Իսկ 31/37 տեղամասում, ըստ Իոաննիսյանի, հանձնաժողովի նախագահը ընտրողներին, որոնք չեն խնդրել օգնողով քվեարկել, ինքն իր նախաձեռնությամբ օգնող է առաջարկել:
Իոաննիսյանի խոսքով` մտահոգիչ երեւույթ են նկատել նաեւ երեկ ու այսօր մինչ այս պահը լռության ռեժիմի խախտման հետ կապված: Ըստ նրա՝ մի շարք սուբյեկտներ, թե կուսակցություններ, թե ոչ կուսակցություններ նախընտրական բացահայտ քարոզչություն են իրականացրել: Խոսքը հիմնականում համացանցում քարոզչություն անելու մասին է:
Արփինե ՍԻՄՈՆՅԱՆ
