Գյումրու ՏԻՄ ընտրություններին մասնակցող ընդդիմադիր «Մայր Հայաստան» դաշինքի քաղաքապետի թեկնածու Կարեն Սիմոնյանն իր ընտրությունը կատարեց Շիրակի պետական համալսարանում տեղակայված ընտրատեղամասերից մեկում։ Նա քվեարկության էր եկել ընտանիքի անդամների հետ։ Լրագրողների հետ զրույցում ասաց, որ քվեարկեց հանուն Գյումրիում իշխանափոխության ու այս քաղաքի երիտասարդների լավ ապրելակերպի։
Local government elections are underway in Gyumri. Gyumri, Armenia
Նա ասաց, որ կոչ են արել ընդդիմադիր ուժերին առանց պաշտոնակռվի աջակցել առավելագույն ձայներ ստացած ընդդիմադիրին, որ կարողանան ՔՊ-ին իշխանազրկել։
«Եթե տարաձայնություններ լինեն, տեսնենք, որ չի ստացնում ընդդիմադիր դաշտի համախմբումը, «Մայր Հայաստանը» պատրաստ է դառնալ այն լոկոմոտիվը, որ ՔՊ-ին իշխանազրկենք Գյումրի քաղաքից։ Չի կարելի ընդդիմադիր դաշտը պառակտել հանուն պաշտոնակռվի, հանուն ամբիցիաների», -ասաց Կարեն Սիմոնյանը։
Կարդացեք նաև
Նա խոսեց նաև ընտրախախտումներից, ասաց, որ իրենց վարկաբեկող ցուցապաստառներ էին փակցրել, և երբ հայտնաբերել են, թե ովքեր են, պարզվել է՝ նրանք Գյումրիից չեն։ Նրանք խոստովանել են, որ իրենց 15 հազար դրամ են տվել, անգամ ճանապարհածախսն են հոգացել, որ գան Գյումրի՝ «Մայր Հայաստան» դաշինիքին վարկաբեկելու։
Կարեն Սիմոնյանը նաև ասաց, որ վրացական պետհամարանիշներով մի մեծ ավտոբուս է կանգնած Բեռլին հյուրանոցի մոտ։
«Երեկ երեկոյան մեր համակիրներից նկարահանել են ավտոբուսը՝ վրացական համարներով՝ Բեռլին հյուրանոցի դիմաց է կանգնել, այնտեղից բազմաթիվ մարդիկ են իջել։ Վրացական համարանիշներով են, բայց չգիտեմ՝ միջից ջավախքահայե՞ր են իջել, հնդիկներն ու պարսիկներ են»,- ասաց թեկնածուն։
Մանրամասները՝ տեսանյութում
Նունե ԱՐԵՎՇԱՏՅԱՆ
