«Զգույշ խոսեք պատերազմի և պատերազմի մասնակիցների մասին․ ամեն մեկիս մարմնի սպիները ձեր բոյից երկար են»,-Ազատության հրապարակում ի պաշտպանություն արցախցիների իրավունքների անցկացված հանրահավաքի ժամանակ իր ելույթում զգուշացրեց Արցախյան պատերազմի մասնակից, պահեստազորի փոխգնդապետ Վահրամ Հակոբյանը՝ անդրադառնալով արցախցիներին ուղղված այն հայտարարություններին, թե «մնայիք, կռվեիք»։
Ինչպես արդեն տեղեկացրել ենք, ի պաշտպանություն արցախցիների իրավունքների հանրահավաքից հետո Ազատության հրապարակում վրաններ տեղադրվեցին։ Արցախցիները գիշերում են Ազատության հրապարակում։
Կարդացեք նաև
Անդրադառնալով Արցախյան շարժման մասին՝ ՀՀ վարչապետ Նիկոլ Փաշինյանի հայտարարություններին, Վահրամ Հակոբյանը վստահեցրեց․ «Ինչքան էլ փորձեն կասեցնել Արցախյան շարժումը, այն կա, որովհետև այն համաժողովրդական է, իսկ մենք՝ այդ շարժման մարտիկները։ Եկեք մի պահ հիշենք, թե ինչպես եք հատել Հակարիի կամուրջը, ինչպիսի ապրումներ են ունեցել մեր ծնողները, կանայք, երեխաները, հատկապես սպաների ընտանիքները։ Իսկ այսօր կարող եք տեսնել գնդապետին պահակի կարգավիճակում, փոխգնդապետին այգեպանի կարգավիճակում՝ 100-120 հազար դրամ աշխատավարձով»։
Անդրադառնալով արցախցիներին ուղղված «մնայիք, կռվեիք» հայտարարություններ անողներին՝ Վահրամ Հակոբյանն ասաց․ «Իմ ստացած դաստիարակությունը, ապրածս կյանքը և զոհված ընկերների թափած արյան արժանապատվությունը թույլ չի տալիս արժանապատվորեն պատասխանել իրենց, այլ պարզ կասեմ՝ զգույշ խոսեք պատերազմի և պատերազմի մասնակիցների մասին․ ամեն մեկիս մարմնի սպիները ձեր բոյից երկար են»։
Տաթև ՀԱՐՈՒԹՅՈՒՆՅԱՆ
