«Ինքս հասկանում եմ, որ այս իշխանությունների կողմից այս քայլերը չեն իրականացվելու, այս իշխանությունները փորձում են արցախյան թեման մեկընդմիշտ փակել՝ այդ թվում վերադարձի մասին չխոսելով»,- Ազատության հրապարակում լրագրողների հետ զրույցում ասաց Արցախի Հանրապետության նախկին պետնախարար եւ Մարդու իրավունքների պաշտպան Արտակ Բեգլարյանը։
Ինչպես արդեն տեղեկացրել ենք, ի պաշտպանություն արցախցիների իրավունքների հանրահավաքից հետո Ազատության հրապարակում վրաններ տեղադրվեցին։ Արցախցիները գիշերում են Ազատության հրապարակում։
Կարդացեք նաև
Նա պարզաբանեց՝ արցախցիների սոցիալական գլխավոր խնդիրն այն է, որ բնակարանային ծրագիրը ձախողված է, և այդ ֆոնին ՀՀ իշխանությունները որոշել են կտրուկ կտրել կամ կրճատել տրվող բնակվարձի աջակցությունը, որն առաջիկայում սոցիալական առումով ցնցում է առաջացնելու արցախցիների շրջանում։
Անդրադառնալով Ադրբեջանի դեմ ներկայացված միջազգային գանգատները հետ կանչելու՝ ՀՀ իշխանությունների մտադրություններին և հարցին՝ խաղաղության պայմանագիրը խաղաղություն կբերի՞, Արտակ Բեգլարյանը պատասխանեց․ «Միանշանակորեն՝ ոչ։ Միջազգային գանգատների հետ կանչելը, Մինսկի խմբի լուծարումը, Սահմանադրության փոփոխությունը և մնացած բոլոր պահանջները Ալիևի ձեռքին հայ ժողովրդին նվաստացնելու, ՀՀ-ին կապիտուլյացիայի տանելու և իր բոլոր պահանջները ապահովելու միջոց է առանց որևէ պարտավորություն ստանձնելու»։
Նա վստահեցրեց՝ եթե պատշաճ պայմաններ ստեղծվեն, Արցախի ժողովուրդը կվերադառնա իր հայրենիք։
Տաթև ՀԱՐՈՒԹՅՈՒՆՅԱՆ
Լուսանկարը՝ Արցախցիների իրավունքների պաշտպանության խորհրդի էջի
