«Սպորտը բոլորի համար» կազմակերպությունը Երեւանի քաղաքապետարանի սպորտի վարչության աջակցությամբ «Արենա» բոուլինգ ակումբում կազմակերպել էր լրատվամիջոցների բոուլինգի թիմային մրցաշար, որին մասնակցելու իրավունք ունեին նաեւ նախարարությունների եւ գերատեսչությունների մամուլի ծառայություններն ու աշխատակիցները:
Մասնակցության հայտ ներկայացրած ութ լրատվամիջոցներից նախնական փուլը հաղթահարած հինգ թիմերը լավագույնին որոշեցին եզրափակչում: Ծավալվեց համառ մրցակցություն, որի ընթացքում թիմերը փոխնիփոխ հայտնվում էին առաջատարի դերում: Ի վերջո, պայքարի եզրափակիչ փուլը գերազանց անցկացրեց «Առավոտ» թիմը, որի կազմում էին Աշոտ Հակոբյանը, Ռուզան Մինասյանը, Գարիկ Մելքոնյանը եւ Կովկասի բնության հիմնադրամի հանրային կապերի ղեկավար Մարինե Կարապետյանը: Վաստակելով 468 թիմային միավոր՝ «Առավոտը» արժանացավ գլխավոր մրցանակին: Երկրորդ տեղն զբաղեցրեց «Մեդիամաքս» լրատվական գործակալությունը՝ 405 միավորով, Հանրային Հեռուստաընկերության լուրերի բաժնի թիմը 403 միավորով եզրափակեց եռյակը:
Հաղթող թիմի համար անակնկալ էր պատրաստել Կովկասի բնության հիմնադրամը, որը «Առավոտ» թիմի անդամներին նվիրեց «Հայաստանի թռչունները» պատկերազարդ գիրքը:
Աշոտ ՀԱԿՈԲՅԱՆ
