«Անցյալ շաբաթ բոլորս տեսանք խորհրդարանական ստախոսի հիստերիկան, էլ ինքն իրեն զսպել չկարողանալը, միգուցե քիմիական ինչ-որ բաների բացակայության պատճառով, միգուցե մեզ ուղերձ հղելու պատճառով, այլ նպատակ ունենալու, իր տերերին ցույց տալու, թե ինչքան նվիրված է։ Այդ ստախոսը խորհրդարանի ամբիոնից իրեն ամենավատ, ամենափողոցային, ամենագռեհիկ ձևով պատառոտում էր։ Սա մեր ամոթն է ոչ միայն մեր ներքին կյանքի համար»,-«Արդարության ձգտումը» խորագրով ֆեյսբուքյան ուղիղ եթերի ընթացքում հայտարարեց Բագրատ սրբազանը՝ անդրադառնալով խորհրդարանում ՀՀ վարչապետ Նիկոլ Փաշինյանի հայտարարություններին։
Բագրատ Սրբազանը, դիմելով քաղաքացիներին, ասաց․ «Պատկերացրեք, որ մեզ դիտում են աշխարհում տարբեր պետությունների ներկայացուցիչները և իրենց տեղեկություններն են ուղարկում իրենց երկրների ղեկավարներին, որոնց հետ հանդիպելու է կոչված այս պարագային այս ստախոսը՝ որպես այս պարագային մեր երկրի ղեկավար։ Պատկերացնո՞ւմ եք՝ այդ մարդիկ ի՞նչ աչքով են նայում, պատկերացնո՞ւմ եք ամոթը։ Պատկերացնո՞ւմ եք այս չարիքն իր խորհրդարանական ճղճղոցից հետո տարբեր երկրների ղեկավարների հետ հանդիպումների մեջ է լինում։ Խնդիրը միայն ինքը չէ․ իր միջոցով մեր հավաքական նկարագիրն է։ Ուրախ եմ նաև ասելու, որ տարբեր երկրներում հստակ կերպով տարանջատում են այս ստախոսին Հայաստանից կամ հայ ժողովրդից»։
Բագրատ Սրբազանը, անդրադառնալով նաև հայտարարագրման գործընթացին, ասաց․ «Ուրիշ Աստված չունի այդ մարդը իր որովայնից բացի՝ փորձելով այս ժամանակահատվածում նյութական շահագրգռվածությամբ մարդկանց տանել դեպի իր տիրապետությունը։ Ուրիշ միջոց չունի մարդկանց այլևս որևէ ձևով համոզելու՝ փորձելով մեզ կաշառել՝ ասելով, եթե հայտարարագիրը լրացնում եք, այսքան գումար եք ստանում, այսինչ բանն անում եք, այսքան գումար եք ստանում՝ անընդհատ փորձելով առևտրի մեջ լինել։ Այդ գումարներն ինչո՞ւ պիտի վճարեն, որ ինքն իրեն կարողանա պահել իր փողի, պաշտոնի վրա՝ մեզ փորձելով դարձնել իր նման՝ ում Աստվածն իր որովայնն է»։
Կարդացեք նաև
Տաթև ՀԱՐՈՒԹՅՈՒՆՅԱՆ
