«Հանուն Հանրապետության» կուսակցության նախագահ Արման Բաբաջանյանի ֆեյսբուքյան գրառումը
Երբ իշխող կուսակցության նորելուկ անդամ քաղաքապետի թեկնածուն հարցին՝ «եթե ՔՊ-ն իշխանությունից հեռանա, կմնա՞ք կուսակցության մեջ», պատասխանում է՝ «հո ես Նոստրադամուսը չեմ», ամեն ինչ դառնում է հասկանալի։ Մարդը միացել է կուսակցությանը ոչ թե գաղափարի, ոչ թե արժեքների, ոչ թե երկրի ապագայի հանդեպ պատասխանատվության զգացումով, այլ շատ պարզ պատճառով՝ ՔՊ-ն իշխանություն է, ինքը՝ քաղաքապետ դառնալու ցանկություն ունի։ Չլինի իշխանություն՝ ինքը էլ չի լինի կուսակցության անդամ։
Սա դասական պատեհապաշտություն է՝ երբ քաղաքականությունը դառնում է պաշտոն ստանալու միջոց, ոչ թե պատասխանատվություն կրելու ճանապարհ։ Իսկ երբ նման պատասխանը հնչում է իշխող ուժի թեկնածուի շուրթերից, դա նշանակում է միայն մեկ բան՝ կուսակցությունը կորցրել է իր ներքին գաղափարական շերտը, որակը։
Որպես կուսակցության ղեկավար, նման պահի կհրավիրեի քաղխորհրդի նիստ և անմիջապես կխնդրեի դադարեցնել նման մարդու անդամակցությունը կուսակցությանը։ Այլապես ստացվում է, որ կուսակցությունը համաձայն է նման մտածողության հետ։
Կարդացեք նաև
Այս ընտրություններում պայքարը միայն նախկինների դեմ չէ։ Սա պայքար է նաև այսպիսի գաղափարազուրկ ներկայի դեմ։ Երբ կուսակցությունը ոչ միայն չի կարողանում պատասխանատվություն կրել անցյալի համար, այլև ներկան է կառուցում պատահական, պատեհապաշտ գործիչների վրա, դա արդեն վտանգ է։
