ՀՀ վարչական դատարանում դատավոր Անի Հարությունյանի նախագահությամբ կայացավ Արցախից բռնի տեղահանված Մերի Ղարայանի հայցով դատաքննությունը՝ ընդդեմ ՆԳ միգրացիայի եւ քաղաքացիության ծառայության՝ հայցվորին ժամանակավոր պաշտպանության տակ վերցնել պարտավորեցնելու պահանջով:
ՀՀ կառավարությունը որոշումով սահմանել է, որ 2023 թվականի սեպտեմբերյան իրադարձությունների հետեւանքով բռնի տեղահանված անձինք, իսկ նրանք 120 հազար արցախցիներն են, պետք է ստանան ժամանակավոր պաշտպանություն եւ փախստականի կարգավիճակ։ Արցախցի Մերի Ղարայանը այդ նպատակով դիմել է Միգրացիայի եւ քաղաքացիության ծառայություն, սակայն մերժում է ստացել՝ հիմնավորմամբ, որ նա ավելի վաղ ստացել է ՀՀ քաղաքացիություն, հետեւաբար, կառավարությունը նրան փախստականի կարգավիճակ տալ չի կարող։
Հայցվորը ծնվել է Գորիսում, ամուսնանալուց հետո տեղափոխվել է Արցախ եւ բոլոր արցախցիների նման ստացել 070 կոդով անձնագիր: Նա ուզում է հասկանալ, թե ինչու է իր նկատմամբ տարբերակված մոտեցում ցուցաբերվում: Դիմելով վարչական դատարան՝ նա պահանջում է, որպեսզի առ ոչինչ ճանաչվի Միգրացիայի եւ քաղաքացիության ծառայության այդ որոշումը: Հայցի հիմքում պահանջն այն է, որ բոլոր արցախցիները Հայաստանի Հանրապետության անձնագիր ունեն, ՀՀ քաղաքացի են, իսկ Միգրացիայի եւ քաղաքացիության ծառայությունը արցախցիների մի մասին ժամանակավոր պաշտպանության կարգավիճակ տալիս է, մյուս մասին՝ մերժում:
Կարդացեք նաև
Մերի Ղարայանի ներկայացուցիչ Մարատ Եգանյանը դատարանին ներկայացրեց արխիվներից ձեռք բերված դեռեւս 90-ական թվականների փաստաթղթեր, այդ թվում՝ տարբեր ատյանների դատարանների որոշումներ, որոնցով ամրագրված է արցախցիների՝ Հայաստանի Հանրապետության քաղաքացիությունը առանց քաղաքացիություն ստանալու դիմում ներկայացնելու անհրաժեշտության եւ առանց ՀՀ նախագահի հրամանագրի:
Դատական նիստը հետաձգվեց, հաջորդ նիստը նշանակվեց հոկտեմբերի 1-ին, ժամը 15:00-ին:
Աշոտ ՀԱԿՈԲՅԱՆ
