«Ազատություն». Տասնյակ ամերիկացի օրենսդիրներ մարտի 25-ին նախագահ Դոնալդ Թրամփին կոչ են արել չեղարկել ԱՄՆ Գլոբալ մեդիայի գործակալությունը (USAGM) փակելու մասին իր հրամանագիրը՝ պնդելով, որ այդ քայլը վնասակար ազդեցություն կունենա իր հեռարձակողների, այդ թվում՝ «Ազատ Եվրոպա/Ազատություն» ռադիոկայանի վրա և միայն կօգնի ԱՄՆ հակառակորդներին, ինչպիսիք են Ռուսաստանը, Չինաստանը, Իրանը, Հյուսիսային Կորեան:
Թրամփին ուղղված նամակում, որը ստորագրել են Կոնգրեսի ավելի քան 40 անդամներ, ասվում է, որ USAGM-ի փակումը կվնասի նաև ԱՄՆ հեղինակությանը և նրա գլոբալ դիրքին ամբողջ աշխարհում:
«Եթե ավելի ուղիղ, դա միլիոնավոր մարդկանց՝ Հավանայից մինչև Կարակաս, Մինսկից մինչև Թեհրան՝ փակ և սահմանափակված միջավայրերում, կթողնի իրենց շրջապատող աշխարհի մասին տեղեկատվություն ստանալու նվազ հնարավորություններ», – ասված է նամակում, – «Մենք խստորեն կոչ ենք անում Ձեզ վերանայել այս հրամանագիրը և ապահովել, որ ԱՄՆ Գլոբալ մեդիա գործակալության և նրա հեռարձակողների կարևոր աշխատանքը շարունակվի»:
Ներկայացուցիչների պալատի արտաքին հարաբերությունների հանձնաժողովի Եվրոպայի ենթակոմիտեի բարձրաստիճան անդամ, Բիլ Քիթինգը (դեմոկրատ Մասաչուսեթս նահանգից) հայտարարել է, որ «Ազատ Եվրոպա/Ազատություն» ռադիոկայանը, «Ամերիկայի ձայնը», «Ազատ Ասիա» ռադիոկայանը և այլ լրատվամիջոցներ, որոնք վերահսկվում են USAGM-ի կողմից, «ծառայում են որպես փափուկ ուժի կենսական գործիքներ», որոնք թույլ են տալիս փակ հասարակությունների մարդկանց օգտվել հավաստի և օբյեկտիվ տեղեկատվությունից:
Կարդացեք նաև
«Նրանց աշխատանքն այնքան արդյունավետ է, որ Իրանի, Ռուսաստանի և Չինաստանի ռեժիմները դատապարտել են այն որպես ազգային անվտանգության սպառնալիք», – նշել է Քիթինգը մամուլի հաղորդագրության մեջ, որում նա Թրամփի մարտի 14-ի հրամանը անվանել է «անխոհեմ» և ասել, որ այն «խրախուսում է ԱՄՆ հակառակորդներին, որոնք սարսափում են վստահելի ԶԼՄ-ներից»:
«Ազատ Եվրոպա/Ազատություն» ռադիոկայանի փակումը թույլ կտա Ռուսաստանի, Բելառուսի, Իրանի և Կենտրոնական Ասիայի կառավարություններին տարածել ռեժիմի քարոզչության վերաբերյալ իրենց սեփական մոտեցումները՝ չվախենալով պատասխանատվության ենթարկվել մրցանակակիր աշխատանքներ ունեցող «Ազատության» առջև, ասված է նամակում:
Նյութն ամբողջությամբ՝ սկզբնաղբյուր կայքում:
