«Լրագրողների հետ շատ զգույշ». ԱԺ-ում կառավարության հետ հարց ու պատասխանի ժամանակ, որին մասնակցում է նաև Նիկոլ Փաշինյանը, լրագրողներն ակցիա են իրականացնում՝ բողոքելով լրագրող Հռիփսիմե Ջեբեջյանի նկատմամբ Անդրանիկ Քոչարյանի պահվածքի դեմ։
ԱԺ անվտանգության աշխատակիցները խոչընդոտեցին լրագրողների խաղաղ ցույցը: Լրագրողները փորձում էին պաստառ պահել օթյակից՝ «Անդրանիկ Քոչարյան, շուրթերդ մաքրիր»: Սակայն անվտանգության աշխատակիցները քաշքշելով խլեցին պաստառը և դուրս հրավիրեցին նրանց:«ԱԺ-ում հավատարմագրված լրագրողն իրավունք չունի ԱԺ վարչական շենքում ակցիա իրականացնել»,- ասաց պետական պահպանության ծառայության աշխատակիցներից մեկը:
Ապա ԱԺ նախագահ Ալեն Սիմոնյանը մոտեցավ՝ ասելով, որ պաստառը վերցնելու հրահանգը ինքը չի տվել:
Կարդացեք նաև
Ինչպես հայտնում է «Փաստինֆոն»-ն ԱԺ-ում հավատարմագրված լրագրողները Ազգային ժողովի մուտքի մոտ դիմավորել են վարչապետ Փաշինյանին և նրան նամակ հանձնել՝ պահանջով՝ ԱԺ-ում ձևավորել էթիկայի ժամանակավոր հանձնաժողով՝ քննելու ՔՊ-ական պատգամավոր Անդրանիկ Քոչարյանի վարքագիծը։
Փաշինյանը վերցրել է նամակը և ձեռնպահ մնացել տեղի ունեցածին գնահատականներ տալուց։
Դիմումին միացել է 161 լրագրող։
«Նիկոլ Փաշինյանից ակնկալում ենք, որ որպես ՔՊ վարչության նախագահ որպեսզի քննի իր թիմակցի վարքը, որովհետև իմ կարծիքով, մեր երկրում նման պատգամավոր ունենալը անթույլատրելի է։ Հույս ունեմ, որ վարչապետը կանսա այսքան լրագրողի հորդորին»,- լրագրողների հետ զրույցում ասաց Հռիփսիմե Ջեբեջյանը, որը կազմակերպել էր ստորագրահավաքը։
Հիշեցնենք՝ օրեր առաջ Անդրանիկ Քոչարյանը վիրավորական արտահայտություններ էր թույլ տվել լրագրող Հռիփսիմե Ջեբեջյանի հասցեին, նա նախ հորդորել էր լրագրողին իրենից հեռու կանգնել, ապա ասել էր «Մաքրեք ձեր բերանը»՝ հայտարարելով, որ ինքը կրկնում է հոգևորականի հորդորը։
